ٹی ٹوئنٹی ورلڈ کپ: پی سی بی نےٹورنامنٹ کیلئے ابتدائی اسکواڈ کے نام آئی سی سی کو بھجوا دیے

لاہور: پاکستان کرکٹ بورڈ (پی سی بی) نے اگلے فروری میں ہونے والے ٹی ٹوئنٹی ورلڈکپ کیلئے ابتدائی اسکواڈ کے نام آئی سی سی کو بھجوادیے۔

ذرائع کے مطابق پی سی بی نے ابتدائی 15 رکنی اسکواڈ کے ساتھ ریزرو کھلاڑیوں کے نام بھی آئی سی سی کو بھجوائے  ہیں، پی سی بی سری لنکا کے خلاف سیریز کے بعد ورلڈ کپ اور آسٹریلیا کے ساتھ سیریز کے اسکواڈ کے حتمی اعلان کا ارادہ رکھتا ہے۔

پی سی بی کی جانب سے بھجوائے گئے ابتدائی ناموں میں دورہ سری لنکا کے کھلاڑیوں کے ساتھ بابر اعظم شاہین آفریدی اور حارث روف کے نام بھی شامل ہیں،جبکہ دورہ سری لنکا کیلئے ٹی ٹوئنٹی اسکواڈ میں کپتان سلمان علی آغا، عبدالصمد، ابرار احمد، فہیم اشرف، فخر زمان، خواجہ محمد نافع اور محمد نواز شامل ہیں۔

اسی طرح محمد سلمان مرزا، محمد وسیم جونیئر، نسیم شاہ، صاحبزادہ فرحان، صائم ایوب، شاداب خان، عثمان خان اور عثمان طارق بھی اسکواڈ میں شامل ہیں۔

ذرائع کا کہنا ہے کہ پی سی بی 31 جنوری سے پہلے آئی سی سی کی اجازت کے بغیر ناموں میں تبدیلی کر سکتا ہے، اس کے بعد ٹیم میں تبدیلی کے لیے آئی سی سی ٹیکنیکل کمیٹی سے اجازت ضروری ہوگی۔

خیال رہے کہ آئی سی سی ٹی ٹوئنٹی ورلڈ کپ 7 فروری سے بھارت اور سری لنکا میں شیڈولڈ ہے اور پاکستان ٹیم اپنے تمام میچز سری لنکا میں کھیلے گی۔