برزل پاس میں برفانی تودہ گرنے سے کیپٹن عصمد گلفام سمیت 3 جوان شہید

راولپنڈی:  پاک فوج کے شعبہ تعلقات عامہ (آئی ایس پی آر)کے مطابق برزل پاس کھولنے کیلئے برف ہٹانے کے آپریشن کے دوران برفانی تودہ گرنے سے کیپٹن سمیت 3 افراد شہید ہو گئے۔

ترجمان آئی ایس پی آر کے مطابق 3 جنوری کو رات تقریباً 2 بجے آپریشن کے دوران اچانک برفانی تودہ گرنے سے کیپٹن عصمد، دو فوجی جوان اور ایک سول مشین آپریٹر پی ڈبلیو ڈی برف تلے دب گئے۔

ترجمان کے مطابق شدید موسم اور دشوار حالات کے باوجود فوری اور بھرپور ریسکیو آپریشن کے ذریعے چاروں افراد کو برف کے نیچے سے نکال لیا گیا تاہم کیپٹن عصمد، سپاہی رضوان عمر 32 سال (رہائشی اٹک) اور مشین آپریٹر عیسیٰ (رہائشی استور) کی حالت تشویشناک ہوگئی اور وہ جانبر نہ ہو سکے۔

ترجمان کا کہنا تھا کہ شہدا نے انتہائی دشوار اور نامساعد موسمی حالات میں کٹھن آپریشن کی قیادت کی،جان کا نذرانہ دینے والوں کی قربانی اور فرض شناسی پاک فوج کے عزم کی روشن مثال ہے، پاک افواج کے تمام رینکس وطنِ عزیز کے دفاع کیلئے پُرعزم ہیں۔

آئی ایس پی آر نے کہا کہ یہ عظیم قربانی اس امر کی واضح مثال ہے کہ پاکستان کی مسلح افواج کے تمام افسران اور جوان مادرِ وطن کے دفاع کے لیے ہر وقت تیار ہیں۔ پاک فوج کے افسر و جوان فرض کی راہ میں جان دینے سے دریغ نہیں کرتے، واضح رہے کہ 28 سالہ کیپٹن اصمد کا تعلق لاہور سے ہے۔