2027 میں 5 ون ڈے میچوں کی سیریز کھیلنے کے لیےپاکستان انگلینڈ کا دورہ کرے گا

ویب ڈیسک: پاکستان کرکٹ شائقین کے لیے خوشخبری ہے کہ پاکستان اور انگلینڈ کے درمیان 2027 میں پانچ ون ڈے بین الاقوامی میچوں پر مشتمل سیریز کھیلی جائے گی، جس کے شیڈول کی تفصیلات سامنے آ گئی ہیں۔

اعلان کے مطابق دونوں ٹیموں کے درمیان سیریز 15 مئی سے 26 مئی 2027 تک جاری رہے گی، جبکہ مقابلے انگلینڈ کے مختلف شہروں ساؤتھمپٹن، مانچسٹر، لیڈز، چیسٹر لی اسٹریٹ اور کارڈف میں کھیلے جائیں گے۔

شیڈول کے مطابق سیریز کا پہلا میچ 15 مئی کو ساؤتھمپٹن میں ہوگا، دوسرا مقابلہ 19 مئی کو مانچسٹر، تیسرا 21 مئی کو لیڈز، چوتھا 23 مئی کو چیسٹر لی اسٹریٹ جبکہ پانچواں اور آخری ایک روزہ بین الاقوامی میچ 26 مئی کو کارڈف میں کھیلا جائے گا۔

کرکٹ حلقوں کے مطابق یہ سیریز دونوں ٹیموں کے لیے آئی سی سی مینز کرکٹ ورلڈ کپ 2027 کی تیاری کے سلسلے میں غیر معمولی اہمیت رکھتی ہے۔ اس دوران کھلاڑیوں کو اپنی حکمت عملی آزمانے، بہترین کمبی نیشن ترتیب دینے اور بڑے عالمی ایونٹ سے قبل بھرپور تیاری کا موقع ملے گا۔

شائقین کرکٹ کی نظریں اس سیریز پر مرکوز ہیں، کیونکہ پاکستان اور انگلینڈ کے درمیان ہونے والے مقابلے ہمیشہ دلچسپ اور سنسنی خیز تصور کیے جاتے ہیں۔