سعودی عرب : ویکسین نہ لگوانے والے بچوں کے اسکول میں داخلے پر پابندی

عرب میڈیا کی رپورٹ کے مطابق سعودی وزارت صحت نے ہدایت کی ہے کہ 12سے اٹھارہ سال کے طلبا 8 اگست سے قبل کم از کم کورونا ویکسین کی ایک خوراک لگوالیں بصورت دیگر ان کے تعلیمی اداروں میں داخلے پر پابندی ہوگی۔سعودی وزارت نے خبردار کیا ہے کہ جو طلبہ وطالبات 8 اگست سے قبل کورونا ویکسین کی پہلی خوراک نہیں لیں گے وہ نئے تعلیمی سال کے پہلے دن سکول نہیں جاسکتے ہیں ۔ طبی ماہرین کے مطابق ویکسین کی پہلی خوراک اور دوسری خوراک کے درمیان تین ہفتے کا فاصلہ  رکھنا ضروری ہے ۔

سعودی وزارت صحت نے تاکید کی ہے کہ طلبہ اور طالبات کے ساتھیوں، اساتذہ  سمیت   اسکول انتظامیہ کو بھی ویکسین لگوانا ہوگی۔واضح رہے کہ سعودی عرب میں متاثرہ کیسز کی تعداد  530,981 تک جا  پہنچی ہے  جبکہ 8ہزار سے زائد افراد جاں بحق ہوچکے ہیں ۔   دوسری جانب دنیا بھر میں کورونا کی عالمی وبا سے سب سے زیادہ متاثرہ ممالک میں امریکا سرفہرست ہے جہاں 3 کروڑ سے زائد افراد کورونا سے متاثر ہوچکے ہیں جب کہ 6 لاکھ سے زائد اموات ہوئی ہیں۔