وزیر اعلی پنجاب کا اسد کھوکھر کے بیٹے کی دعوت ولیمہ میں فائرنگ کے واقعہ کانوٹس

وزیر اعلیٰ پنجاب سردار عثمان بزدار نے  ڈیفنس کے علاقے میں نامزد صوبائی وزیر اسد کھوکھر کے بیٹے کی دعوت ولیمہ میں فائرنگ کے واقعہ کانوٹس لے لیا۔انسپکٹر جنرل پولیس سے رپورٹ طلب کرلی گئی اور   فائرنگ کے واقعہ کی تحقیقات کا حکم بھی دے دیا۔

وزیر اعلی پنجاب سردار عثمان بزدار نے کہا کہ  سکیورٹی کے انتظامات کے حوالے سے بھی جامع  انکوائری جائے،  غفلت کے ذمہ داروں کا تعین کر کے مزید کارروائی کی جائے ۔عثمان بزدار نے کہا کہ  گرفتار ملزم کے خلاف قانون کے تحت کارروائی کی جائے۔

 فائرنگ کا واقعہ وزیر اعلیٰ پنجاب کے نکلنے کے بعد پیش آیا۔فائرنگ کرنے والے ملزم کو وزیراعلیٰ کی سکیورٹی ٹیم نے موقع سے پکڑا۔ابتدائی تفتیش کے مطابق فائرنگ کا واقعہ ذاتی دشمنی کا نتیجہ ہے۔

خیال رہے کہ  لاہور میں پنجاب کے نامزد  وزیر اسد کھوکھر کےبیٹے کے ولیمے کی تقریب میں فائرنگ ہوئی تھی،  فائرنگ سے اسد کھوکھر کا بھائی مبشر کھوکھر جاں بحق ہو گیا تھا۔  دعوت ولیمہ میں کئی اہم شخصیات موجود تھیں۔

پولیس کا کہنا تھا کہ   واقعہ وزیر اعلی پنجاب کے نکلتے ہی پیش آیا۔  فائرنگ کا واقعہ ڈیفنس سی میں پیش آیا ہے۔پولیس نے فائرنگ کرنے والے ملزم کوگرفتار کرلیا ، ملزم کا نام ناظم ہے اور مانا والا کا رہائشی ہے ،  ملزم کی فائرنگ سے مبشر اور ایک نامعلوم زخمی ہوا ۔