31اگست تک افغانستان سے انخلا مکمل کر لیا جائے گا: بائیڈن

تفصیلات کے مطابق امریکی صدر جوبائیڈن نے وائٹ ہاؤس میں  خطاب  کرتے  ہوئے کہاکہ افغانستان سے ہزاروں افراد کے انخلا میں پیش رفت ہو رہی ہے۔ضرورت پڑنے پر انخلا کیلئے  ڈیڈ لائن بڑھانے سے متعلق غیر ملکی رہنماؤں کی درخواست ملی تو دیکھیں گے  کہ ہم اس معاملے پر کیا معاونت کرسکتے ہیں ۔انہوں نے انخلا کے لیے مدد کرنے والے دنیا کے تمام افراد  کا شکریہ ادا  کیا ۔

امریکی صدر کا کہنا تھا کہ 15 ہزار امریکیوں کو افغانستان سے نکالنے کی ضرورت ہے، اس کے علاوہ امریکی انتظامیہ 50 ہزار افغان اتحادیوں اور ان کے خاندانوں کو ملک سے نکالے گی۔کابل میں سیکورٹی ماحول تیزی سے تبدیل ہوتا ہے۔ حالات بگڑ سکتے تھے چاہے ایک ماہ پہلے انخلا کرتے یا ایک ماہ بعد کرتے۔

انہوں نے کہاکہ انخلا کے معاملے پر طالبان نے مجموعی طور پر معاہدے کی پاسداری کی ہے۔ کابل ایئرپورٹ سے انخلا کے لیے متعدد اقدامات کیے ہیں،  اب تک طالبان نے  امریکی افواج کے خلاف کوئی اقدام نہیں اٹھایا۔ طالبان کہہ چکے ہیں وہ قانونی حیثیت کے حصول کے خواہش مند ہیں، ہماری پہلی ترجیح امریکیوں کو کابل سے جلد سے جلد نکالنا ہے۔

امریکی صدر بائیڈن کا کہنا تھا کہ گزشتہ 36 گھنٹوں میں امریکہ نے افغانستان سے 11 ہزار افراد کو نکال لیا ہے۔قطر ،جرمنی،کویت ،برطانیہ سمیت دیگر ممالک انخلاکے اس مشن کو مکمل کرنے میں ہمارا ساتھ دے رہے ہیں۔ افغانستان سے انخلا کے عمل کو تیز کرنے کے لیے امریکی حکومت نے چھ ایئرلائنز، امریکن ایئرلائنز، اٹلس، ڈیلٹا، اومنی، ہوائی اور یونائیٹڈ کو 18 مسافر طیارے فراہم کرنے کا حکم دیا ہے۔

افغانستان کی صورتحال سے متعلق امریکی صدر کو شدید تنقید کا سامنا کرنا پڑا۔انہوں نے اپنی پریس بریفنگ میں اس بات کا ایک مرتبہ پھر دفاع کیا کہ امریکیوں کے فوری انخلا کا حکم ایک مشکل لیکن ضروری فیصلہ تھا۔ بائیڈن نےانخلا کا فیصلے کو درست قرار دیتے ہوئے کہا کہ اب بھی نہیں تو کیا 10 سال بعد افغانستان سے نکلتے۔