شہباز شریف اور بلاول بھٹو میں ٹیلی فونک رابطہ ، سیاسی  صورتحال پر تبادلہ خیال

تفصیلات کے مطابق پاکستان مسلم لیگ ن اور پاکستان پیپلزپارٹی میں برف پگھلنے لگی ۔  دونوں رہنماؤں کے درمیان  ٹیلی فونک رابطے میں سیاسی صورتحال سمیت الیکشن کمیشن ارکان کی تقرری پر گفتگو ہوئی ۔  چیئرمین پیپلز پارٹی بلاول بھٹو زرداری نے اپوزیشن لیڈر قومی اسمبلی  شہباز شریف سے الیکشن کمیشن کے پنجاب اور خیبر پختونخوا سے تعلق رکھنے والے دو نئے اراکین کی تقرری کے معاملے  پر بھی تبادلہ خیال کیا ۔

ترجمان مسلم لیگ ن کے مطابق نئے  اراکین کی تقرری کے معاملے پر وزیراعظم اور اپوزیشن لیڈر ایک پیج پر نہ آسکے جس کے بعد معاملہ پارلیمانی کمیٹی کو بھجوایا جائے گا۔  دونوں رہنماؤں میں اتفاق رائے ہوا کہ اس آئینی معاملے پر اپوزیشن کی دونوں بڑی جماعتوں کی قیادت مشاورت کے ساتھ آگے بڑھے گی۔