پنجاب میں  بڑی سیاسی اور انتظامی تبدیلیوں کا امکان

ذرائع کے مطابق  وزیر لیبر پنجاب عنصر مجید، سینئرصوبائی وزیر عبدالعلیم خان  اور  وزیر ایکسائز حافظ ممتاز کی وزارت کا بھی قلمدان بدلے جانے کا امکان ہے، ترین گروپ کے اہم رہنما نعمان لنگڑیال کی وزارت کا قلمدان بھی تبدیل ہونے کا امکان ہے۔

ذرائع   کاکہنا ہے کہ  چیف سیکرٹری پنجاب کے متوقع تبادلے کے پیش نظر   مرکز میں تعینات سیکرٹریز کے نام زیر غور ہیں ، متوقع چیف سیکرٹری پنجاب کیلئے تیرہویں کامن سے تعلق رکھنے والے سردار احمد نواز سکھیرا کا نام زیر غور ہے، سردار احمد نواز سکھیرا اسوقت فیڈرل سیکرٹری کیبنٹ ڈویژن کے فرائض انجام دے رہے ہیں۔فیڈرل سیکرٹری داخلہ یوسف نسیم کھوکھر بھی چیف سیکرٹری پنجاب کیلئے امیدوار ہیں ، یوسف نسیم کھوکھر دو ہزار اٹھارہ/ انیس میں چیف سیکرٹری  رہ چکے  ہیں ۔چیف سیکرٹری کے تبادلے کی بڑی وجہ آئندہ بلدیاتی انتخابات کے ساتھ انتظامی معاملات کو بہتر بنانا  ہے۔

ذرائع کے مطابق  آئی جی پنجاب کیلئے پی ایس پی گروپ کے گریڈ 22 کے محسن بٹ، عامر ذوالفقار۔ اے ڈی خواجہ کے نام زیر غور ہیں ، محسن بٹ آئی جی بلوچستان  کے عہدے پر فائز رہ چکے  ہیں ،اے ڈی خواجہ آئی جی سندھ کی  حیثیت  سے خدمات انجام دے چکے ہیں اور  عامر ذوالفقار آئی جی اسلام آباد  کے عہدے پر فائز رہ چکے ہیں ۔