حکومت الیکشن کو متنازعہ بنا چکی ہے : شاہد خاقان عباسی

تفصیلات کے مطابق سابق وزیراعظم اور مسلم لیگ ن رہنما شاہد خاقان عباسی نےاحسن اقبال و دیگر لیگی رہنماؤں کے ساتھ  اسلام آباد میں پریس کانفرنس کرتے ہوئے کہا کہ حکومت کو احساس ہوگیاہے کہ یہ دھاندلی کے بغیر الیکشن نہیں جیت سکتے ، حکومت کی کوشش ہے کہ یہ انتخابات الیکشن کمیشن نہیں حکومت کرائے۔ شاہد خاقان عباسی نے کہاکہ 80 فیصد دھاندلی الیکشن سے پہلے ہوتی ہے ،   اسں الیکشن کے انعقاد کا سنجیدہ مسئلہ ہے، یہ اس ملک کی بدقسمتی ہے کہ یہ حکومت اس پر قابض ہے۔ ایسے الٹے سیدھے قوانین جو آئین سے متصادم ہے لاگو کیے جارہے ہیں ، ایسے قوانین جو بنیادی حقوقِ کو صلب  کرتے ہیں۔ 

لیگی رہنمانے  کہا کہ ایسے قانون جن کا مقصد صرف الیکشن کمیشن کی آئینی حیثیت کو محدود کرنا ہے، اگر آپ الیکشن کمیشن سے حق لینا چاہتے ہیں تو اس میں آئینی ترامیم کریں ۔ انہوں  نے کہا ہے کہ حکومت الیکشن کومتنازع بناناچاہتی ہے ۔اگر آج الیکشن کمیشن  پر حملہ ہواہے توکل عدالت عظمیٰ  پر بھی ہوسکتاہے۔حکومت اپنے مفاد  کےلیے اداروں کو داوپر نہ لگائے۔ حکمرانوں کو اقتدار میں طول چاہیے۔

سابق وزیر اعظم کا کہنا تھا کہ ہمارا مسئلہ  یہ ہے کہ الیکشن چوری ہوتے ہیں۔ الیکشن کمیشن پر قبضہ کر کے اگلے الیکشن میں دھاندلی کی کوشش کی جا رہی ہے۔ہم حکومت کے ان اقدامات اور کوششوں کو مسترد کرتے ہیں۔کسی نے الیکشن ریفارمز کرنے ہیں تو بتائے اصلاحات کیسے کرنی ہیں ۔وزیراعظم اور وزرا آئین کو پڑھ لیں جس میں الیکشن کمیشن کا کردار کا واضح  ہے۔