سندھ اور بلوچستان میں آج سے انسداد پولیو مہم کاآغاز

تفصیلات کے مطابق سندھ اور بلوچستان میں آج سے مختلف دورانیے کی انسداد پولیو مہم شروع ہو رہی ہے۔  سندھ میں ایک ہفتہ جاری رہنے والی مہم کے دوران پانچ سال تک کی عمر کے چورانوے لاکھ بچوں کو پولیو سے بچاؤ کے قطرے پلائے جائیں گے۔اسی طرح بلوچستان کے چونتیس اضلاع میں پانچ روزہ مہم کے دوران پانچ سال تک کی عمر کے تقریباً پچیس لاکھ بچوں کو انسداد پولیو وٹامن اے کے قطرے پلائے جائیں گے۔اس مقصد کیلئے گیارہ ہزار سے زائد ٹیمیں تشکیل دی گئی ہیں۔

سال کی تیسری قومی انسداد مہم  میں 2 لاکھ 90 ہزار ورکرز حصہ لے رہے ہیں ۔ اس سے قبل وزیراعظم کے معاون خصوصی برائے صحت ڈاکٹر فیصل سلطان کا کہنا تھا  کہ حکومت پولیو کے خاتمے کیلئے پر عزم ہے ، پولیو کے خاتمے کیلئے موثر اقدامات کو یقینی بنایا ہے اور قومی مہم میں 40 ملین سے زائد بچوں کو پولیو سے بچاؤ کے قطرے پلانے کا ہدف مقرر کیاگیاہے ۔ ڈاکٹر فیصل سلطان کاکہنا ہے کہ پچھلے سات مہینوں سے پولیو کا کوئی کیس رپورٹ نہیں ہوا، والدین پولیو سے بچاؤ کے قطرے لازمی پلوائیں اورتمام مکتبہ فکر پولیو مہم کی کامیابی میں اپنا کردار ادا کریں۔ 

خیال رہے کہ جنوری 2021 میں بلوچستان میں پولیو کا ایک کیس رپورٹ ہوا تھا۔

واضح رہے کہ پولیو کے خاتمے کی عالمی مہم  1988 میں شروع ہوئی تھی اور اب یہ بیماری دنیا سے خاتمے کے قریب ہے۔ بدقسمتی سے  پاکستان  اور افغانستان  دنیا کے وہ  دو ممالک  ہیں جہاں پولیو وائرس ابھی  تک ختم نہیں ہوسکا ہے ۔ اس سے قبل  25 اگست  کو ورلڈ ہیلتھ آرگنائزیشن (ڈبلیو ایچ او)  افریقہ کو پولیو سے پاک قرار دے چکی  ہے ۔