واشنگٹن : چڑیا گھر کے 9جانوروں میں کورونا وائرس کی تشخیص 

غیر ملکی خبر رساں ادارے کے مطابق واشنگٹن  ڈی سی کے چڑیا گھر میں جانوروں کی دیکھ بھال کرنے والے عملے نے چھ افریقی شیروں اور3 ٹائیگروں میں بھوک، کھانسی، چھینک اور سستی کا مشاہدہ کیا تھا۔ انہوں نے چڑیا گھر کے تمام چھ افریقی شیروں ،ٹائیگرز  میں صرف جانچ کیلئے کورونا کا  ٹیسٹ کیا۔ چڑیا گھرانتظامیہ  نے اپنی ویب سائٹ پربتایا  ہے کہ کورونا کے شکار تمام جانوروں کا علاج کیا جا رہا ہے اور انہیں انتہائی نگہداشت میں رکھا جارہا ہے ۔ حکام  نے بتایا کہ شیر اور ٹائیگر اپنی رہائش گاہوں میں رہیں گے، چڑیا گھر آنے والے لوگوں کو کوئی خطرہ نہیں ہوگا کیونکہ جانوروں اور انسانوں کے درمیان کافی فاصلہ ہے۔

انتظامیہ کے مطابق کسی دوسرے جانور میں کورونا کی علامات ظاہر نہیں ہوئی ہیں ،  لیکن ویٹرنری کورونا وائرس ویکسین بیماری کے خطرے والے جانوروں کو بھی لگائی جائے گی ۔ چڑیا گھر انتظامیہ کے مطابق  جانوروں کی  دیکھ بھال کرنے والے عملے سے تفتیش کی گئی ہے اور تمام افراد ماسک کا بھی باقاعدگی سے استعمال کرتے ہیں لیکن ابھی تک یہ معلوم  نہیں ہوسکا کہ  شیر کیسے کورونا وائرس کا شکار ہوئے۔

خیال رہے کہ اس سے قبل سان ڈیاگو چڑیا گھر سفاری پارک میں گوریلوں ، نیویارک کے برونکس چڑیا گھر میں شیروں اور شیرنیوں  اور اسپین کے بارسلونا چڑیا گھر میں شیروں سمیت متعدد پالتو جانوروں میں کورونا وائرس کی تشخیص ہوئی  تھی ۔

 فش اینڈ وائلڈ لائف سروس کا اندازہ ہے کہ دنیا بھر کے جنگلات  میں اب صرف 3،500 شیر باقی  رہ گئے ہیں ۔