افغانستان پر عائد اقتصادی پابندیاں ختم ہونی چاہئیں : چین

چین کے سٹیٹ کونسلر اور وزیر خارجہ وانگ یی نے کہا ہے کہ افغانستان پر عائد مختلف یک طرفہ پابندیاں جلد از جلد ختم کی جائیں۔ افغانستان کے بارے میں جی 20 وزرائے خارجہ کے اجلاس میں چینی وزیرخارجہ  نے  ایک بیان میں کہا کہ افغانستان پر سے اقتصادی پابندیاں ختم ہونی چاہییں۔ان کاکہنا تھا کہ افغانستان کے زرمبادلہ کے ذخائر قومی اثاثے ہیں جو ملک کے لوگوں کی ملکیت ہونی چاہئیں اسے افغانستان پر سیاسی دباؤ ڈالنے کے لیے سودے بازی کے طور پر استعمال نہ کیا جائے۔

15 اگست کو افغان  حکومت کا تختہ الٹ کر افغان طالبان کے ملک کا کنٹرول سنبھالنے کے بعد امریکہ نے افغانستان کے مرکزی بینک کے 9.5 ارب ڈالرز کے اثاثے منجمد کر رکھے ہیں اور بین الاقوامی قرض دہندگان بھی افغانستان سے دور ہیں، جنہیں خدشہ ہے کہ ان کی فراہم کی گئی رقم طالبان کے استعمال میں نہ آجائے، وہیں چین کے رویے میں طالبان کیلئے نرمی نظر آتی ہے ۔

چین  کے علاوہ  پاکستان بھی متعدد بار عالمی طاقتوں سے مطالبہ کرچکا ہے کہ وہ طالبان کے کنٹرول حاصل کرلینے کے بعد افغانستان کے اربوں ڈالرز کے اثاثوں کو غیر منجمد کریں۔ گزشتہ روز بھی نیویارک میں موجود وزیر خارجہ شاہ محمود قریشی    نے افغان صورتحال پر بات کرتے ہوئے کہا کہ عالمی برادری کو اس نازک تاریخی موڑ پر افغانوں کو تنہا نہیں چھوڑنا چاہیےافغانوں کے منجمد اثاثوں کو کھولنے سے افغانستان کو انسانی بحران سے نکالنے میں مدد ملے گی،ذمہ دارانہ طرز عمل طالبان کے اپنے مفاد میں ہے۔