پاک چین تعلقات کے پیش نظر سی پیک کی بہت اہمیت ہے:اسد عمر

تفصیلات کے مطابق میڈیا سے گفتگو کرتے ہوئے وفاقی وزیر منصوبہ بندی کا کہنا تھا کہ سی پیک کے کچھ نئے معاہدے اور ایک نیا جوائنٹ ورکنگ گروپ بنایا ہے،چینی سرمایہ کاری بڑھنے سے سیکیورٹی کی اہمیت بھی بڑھتی جا رہی ہے جبکہ سی پیک ہمسایہ ملک کی آنکھوں میں کھٹکتا ہے۔

اسد عمر کا کہنا تھا کہ سی پیک منصوبوں کے لیے چینی ورکرز گزشتہ سال ہی واپس آ گئے تھے،ایم ایل ون منصوبے پر بھی میٹنگز چل رہی ہیں، وزیر اعظم بہت جلد کراچی سرکلر ریلوے پراجیکٹ کے انفرا اسٹرکچر کا افتتاح کریں گے۔

ان کا کہنا تھا کہ آئی ٹی جوائنٹ ورکنگ گروپ شروع کرنے کا فیصلہ ہوا ہے جبکہ ہماری معیشت میں زراعت سب سے زیادہ اہمیت رکھتی ہے لیکن مستقبل کی دنیا آئی ٹی اور ٹیکنالوجی کی دنیا ہے،چین اور امریکہ میں ٹیکنالوجی کا مقابلہ چل رہا ہے اور پاکستان کی آئی ٹی انڈسٹری تیزی سے ترقی کر رہی ہے۔

انہوں نے کہا ہے کہ آئی ٹی کی ایکسپورٹ میں 47 فیصد کے قریب اضافہ ہوا ہے اور امید ہے رواں سال بھی آئی ٹی سیکٹر کی ایکسپورٹ میں اضافہ ہوگا۔ بڑی تعداد میں نوجوان آئی ٹی کے سیکٹر میں کام کر رہے ہیں اور تعلیم حاصل کر رہے ہیں۔

اسد عمر کا کہنا ہے کہ کراچی کوسٹل ڈویلپمنٹ پراجیکٹ پر دستخط ہوئے ہیں اور سی پیک کے دائرہ کار میں وسعت آتی جا رہی ہے۔ چینی سرمایہ کاری آئی ہے جو انڈسٹریل زون سے باہر بھی استعمال ہو رہی ہیں اور انڈسٹریل زون بن رہے ہیں۔

ان کا مزید کہنا تھا کہ داسو پراجیکٹ سے متعلق سیکیورٹی کی ضرورت بڑھتی جا رہی ہے اور کوشش ہے داسو معاملے میں ملوث ملزمان کو جلد گرفتار کر کے سزا دی جائے۔