طالبان امن کیلئے امریکہ کے شراکت دار ہوسکتے ہیں: وزیراعظم 

تفصیلات کے مطابق وزیر اعظم عمران خان نے غیر ملکی جریدے نیوز ویک کو انٹرویو دیتے ہوئے کہا کہ افغانستان  بحران کا شکارہے ، امریکا اور پاکستان کو مل کر افغانستان میں امن کے قیام کے لیے طالبان کے ساتھ مل کر کام کرنا ہوگا، افغانستان سے امریکی انخلا کے بعد امریکا کی افغانستان میں ساکھ کو سخت نقصان پہنچا ہے۔

وزیراعظم نے کہاکہ امریکا اور خطے کی طاقتوں کے درمیان تعاون ہی تباہی سے بچنے کا واحد راستہ ہے۔  کابل میں دہشت گردوں کے خاتمے کے لیےحکام کے ساتھ ملکرکام کرنا ہوگا ،  امریکی انخلا کے بعد افغانستان میں عبوری دور مشکل ہے،  پورے افغانستان پر طالبان کے کنٹرول کے بعد امن کی امید ہے۔

انہو ں نے مزید کہاکہ افغانستان میں دہشتگرد گروپس  کو غیر موثر کرنے کے لیے افغان حکومت کے ساتھ کام کرنا ہوگا ، افغانستان میں کالعدم ٹی ٹی پی کو غیر موثرکرنے کےلیے افغان حکومت کےساتھ کام کرناہوگا۔ پاکستان اور امریکہ دونوں افغانستان سے دہشتگردی کا خاتمہ چاہتے ہیں، پاکستان اور امریکہ کو افغانستان میں استحکام اور انسانی بحران کے خاتمے کے لیے مدد دینا ہوگی۔