ملک میں کورونا ویکسین کی ایک ڈوز لگوانے والوں کی تعداد 6 کروڑ سے تجاوز

تفصیلات کے مطابق  وفاقی وزیر و نیشنل کمانڈ اینڈ آپریشن سینٹر کے سربراہ اسد عمر نے سماجی رابطے کی ویب سائٹ ٹوئٹر پر اپنے پیغام میں کہا کہ الحمد اللہ  کم سے کم ایک ویکسین لگانے والوں کی تعداد 6 کروڑ سے تجاوزکرگئی ، آج مکمل ویکسی نیشن والوں کی تعداد 3 کروڑسے زائد ہو جائے گی ۔ اسدعمر کا کہنا تھا کہ 31دسمبرتک7کروڑافرادکی ویکسی نیشن ہدف حاصل کیاجائےگا، ابھی تک ویکسین نہیں لگوائی توآج ہی لگوائیں۔

الحمد للہ کم سے کم ایک ویکسین لگانے والوں کی تعداد 6 کروڑ سے تجاوز کر گئی. آج انشاءاللہ مکمل ویکسینیشن کروانے والوں کی تعداد 3 کروڑ سے زائد ہو جائے گی. 31 دسمبر تک 7 کروڑ پاکستانیوں کی ویکسینیشن کے ہدف کو انشاءاللہ حاصل کیا جائے گا. ابھی تک ویکسین نہیں لگوائی تو آج ہی لگوائیں

— Asad Umar (@Asad_Umar) October 2, 2021

خیال رہے کہ این سی او سی نے  پاکستان میں کورونا صورتحال میں بہتری کے پیش نظر یکم اکتوبر سے بندشوں میں کمی کا اعلان کرتے ہوئے کہا تھا کہ یکم اکتوبر سے مکمل ویکسین نہ لگوانےوالے افراد پر پابندی لگائی جارہی ہے۔  این سی او سی اجلاس میں ویکسین لگانے کے عمل کا جائزہ لیتے ہوئے کہا گیا تھا کہ  یکم اکتوبر سے ویکسی نیشن کی بنیاد پر بندشیں لگیں گی، جن شہروں میں ویکسینیشن کی شرح کم ہے وہاں زیادہ پابندیاں عائد ہوں گی، جو شہری ویکسینیشن نہیں کروا رہے ان پرسخت  پابندیاں عائد ہوں گی۔

واضح رہے کہ  نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں کورونا وائرس کی  چوتھی  لہر کے دوران  گزشتہ چوبیس گھنٹے  میں  کورونا کے ایک ہزار664 نئے کیسز سامنے  آئے  اور 46 اموات کی تصدیق ہوئی۔ملک میں  اموات کی مجموعی تعداد27ہزار831ہوگئی ہے،جبکہ  متاثرہ افراد کی مجموعی تعداد 12لاکھ48ہزار202تک پہنچ گئی ہے۔  این سی اوسی کے مطابق ملک میں کورونا کے فعال کیسز کی تعداد46ہزار934 ہوگئی  ۔