پاکستان میں سول اور ملٹری کے درمیان تعلقات آئیڈیل ہیں:فواد چوہدری

تفصیلات کے مطابق وفاقی کابینہ کے اجلاس کے بعد میڈیا سے گفتگو کرتے ہوئے فواد چوہدری نے کہا ہے کہ رات کو وزیراعظم اور آرمی چیف کی طویل نشست ہوئی، وزیراعظم اور آرمی چیف کے بہت قریبی تعلقات ہیں۔

فواد چوہدری کا کہنا تھا کہ رحمت اللعالمین ﷺ اتھارٹی بنانے کا مقصد یہ ہے کہ ہم سیرت نبی ﷺ سے سبق حاصل کریں۔ رحمت اللعالمین اتھارٹی بچوں کے لیے تعلیمی نصاب کے حوالے سے کام کرے گی،رحمت اللعالمین اتھارٹی میں پاکستان سمیت دنیا کے بہترین اسکالرز شامل ہوں گے۔

ان کا کہنا تھا کہ ڈاکٹرعبدالقدیر خان کی نماز جنازہ میں 15 سے زائد وزرا شریک ہوئے تھے اور ہمارے وزرا میں یہ چیز نہیں ہے کہ ہم ہر جگہ پر اپنی تصاویر بنوائیں،نماز جنازہ میں چیئرمین جوائنٹ چیفس آف اسٹاف اور نیول چیف بھی شریک ہوئے تھے۔

وزیر اطلاعات کاکہنا تھا کہ کابینہ کو الیکٹرانک ووٹنگ مشین متعارف کرانے اور بیرون ملک پاکستان کو ووٹ کا حق دینے کے حوالے سے بریفنگ دی گئی ہے۔

ان کہنا تھا کہ کابینہ کا کوئی بھی اجلاس ایسا نہیں جس میں ہم انتخابی اصلاحات اور بیرون ملک پاکستانیوں کے حقوق کے تحفظ کے لیے بات نہ کی ہو اور ہم آج بھی اس بات پر قائم ہیں کہ بیرون ملک پاکستانیوں کو ووٹ کی سہولت دینی ہے تاکہ وہ ووٹ دے سکیں۔

ان کا مزید کہنا تھا کہ وفاقی کابینہ کے اجلاس میں پیمرا کونسل آف کمپلینٹ اسلام آباد کی تشکیل کی منظوری دی گئی ہے۔