اسپوٹیفائے کی میوزک اسٹریمنگ سروس کا پاکستان میں آغاز

غیر ملکی خبر رساں ادارے کے مطابق  اسپوٹیفائے ، دنیا میں معروف میوزک اسٹریمنگ سروس کا آغاز پاکستان میں ہوچکا ہے ، 80 سے زائد نئی مارکیٹوں میں سے ایک پاکستان  ہے جہاں اس مہینے اسپوٹیفائے نے اپنی سروس شروع کی ہے۔

نئی شروع ہونے والے سروس آئی او ایس اور انڈروئیڈ  ایپ کے ذریعہ مفت دستیاب ہوگی اور صارفین کے پاس  ایڈ فری  رسائی حاصل کرنے کیلئے اسپوٹیفائے  پریمیم میں اپ گریڈ کرنے کا اختیار  ہوگا اور موسیقی کو ڈاؤن لوڈ کرنے اور لامحدود گانوں کو  سکپ ( چھوڑنے)  کے فیچرز میسر ہونگے۔

 اس کی قیمت ہر ماہ 299روپے  ہے۔اسپوٹیفائے  ہر ماہ 479روپے کے لئے پریمیم فیملی سبسکرپشن   کا منصوبہ بھی پیش کر رہا ہے جسے "ایک چھت تلے رہائش پذیر" خاندان کے 6افراد استعمال کرسکیں گے اور ایک ہی پتے پر رہنے والے دو افراد کے لئے 390روپے  کا سبسکرپشن پلان بھی ہے۔ یونیورسٹی کے طلباء کیلئے 149 روپے  میں ہر مہینے  سبسکرپشن پلان دستیاب ہے۔

وہ صارفین جن کے پاس ٹیلی نار یا زونگ کی سم ہے  وہ اپنے  موبائل کریڈٹ  کا استعمال کرکے اس سبسکرپشن  کی ادائیگی کرسکتے ہیں۔

ایک بیان میں کمپنی نے کہا کہ اس کی کیٹلاگ میں مقامی اور بین الاقوامی موسیقی کے 70 ملین سے زیادہ ٹریک شامل ہیں۔ اس ایپ میں پہلے ہی پاکستان کے لئے بنائی گئی مختلف پلے لسٹس شامل ہیں ،  بشمول ہاٹ ہٹس پاکستان ، پاکستانی راک ہٹس ، ڈرامہ او ایس ٹی  اور بہت کچھ۔

حال ہی میں اسپوٹیفائے نے اپنے آفیشل ٹوئٹر اکاؤنٹ سے اعلان کیا تھا کہ وہ جلد پاکستان، بنگلا دیش اور نائجیریا سمیت دیگر 80 ملکوں میں لانچ کیا جائے گا۔ اسپوٹیفائے کے ذریعے دنیا بھر میں ایک ارب سے زیادہ لوگوں کو میوزک اسٹریمنگ سروس دستیاب ہے۔

خیال رہے کہ  نومبر 2020 میں معروف فوٹو شیئرنگ ایپ انسٹاگرام پر اسپوٹیفائے پاکستان کے نام سے ویریفائیڈ اکاؤنٹ بھی بنایا گیا تھا۔لیکن   کمپنی کی جانب سے پاکستان میں اسپوٹیفائے لانچ کرنے کے حوالے سے کوئی اعلان نہیں کیا گیا تھا۔