کراچی : ٹریفک حادثات میں دو افراد جاں بحق ، 5 زخمی

تفصیلات کے مطابق کراچی کے علاقے    نوری آباد لکی سیمنٹ فیکٹری کے قریب مسافر کوچ کو حادثہ پیش آیا ،جس کے نتیجے میں ایک شخص موقع پر ہی دم توڑ گیا  جبکہ 5 افراد زخمی ہوگئے  ۔حادثے کی اطلاع ملتے ہی ریسکیو اورامدادی ٹیمیں  موقع پر پہنچ گئیں ،  ریسکیو کے مطابق زخمیوں کو طبی امداد کے لئے قریبی اسپتال منتقل کیا جارہا ہے۔

دوسری جانب کراچی  صفورا چورنگی بلاک 07 الحبیب بینک کے قریب  ٹریفک   حادثے میں  ایک شخص    جاں بحق ہوگیا ۔  چھیپا ذرائع کے مطابق  جاں بحق  ہونے والے شخص کی شناخت شکیل احمد ولد احمد شیخ  اور عمر30سال ہے ۔ جاں بحق  شخص کو چھیپا ایمبولینس کے ذر یعے عباسی ہسپتال منتقل کیا جارہا ہے۔

واضح رہے کہ عالمی ادارہ صحت کے مطابق پاکستان میں سالانہ 35 ہزار لوگ سڑک حادثات  میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا  جاں بحق ہوجاتا ہے۔