تمام اداروں سے مثالی تعلقات ہیں:وزیرخارجہ

تفصیلات کے مطابق شاہ محمود قریشی کا کہنا تھا کہ حکومت ختم ہونے کی اپوزیشن کی خواہش پوری نہیں ہو سکتی،لولی لنگڑی اپوزیشن سے حکومت کو کوئی خطرہ نہیں،آئینی مدت پوری کریں گے ،اگلی باری پھر ہماری ہے۔

وزیرخارجہ کا کہنا تھا کہ کورونا کی عالمی وبا نے پوری دنیا کی معیشت کو متاثر کیا ہے،عالمی منڈی میں تیل کی قیمتیں بڑھنے سے ہمیں بھی پٹرولیم مصنوعات کی قیمتوں میں اضافہ کرنا پڑا ۔

ان کا کہنا تھا کہ حکومت کی پوری کوشش ہے کہ عوام پر کم سے کم بوجھ ڈالا جا ئے،مہنگائی موجودہ حکومت کیلئے بہت بڑا چیلنج ہے،مہنگائی کی وجوہات اس کے اندرونی اور بیرونی عوامل اور ان سے نبرد آزما ہونے کی حکمت عملی طے کی جارہی ہے۔ 

انہوں نے کہا ہے کہ ہماری اقتصادی ٹیم ہوم ورک کررہی ہے جس کے انشاءاللہ مثبت نتائج سامنے آئیں گے،معاشرے کے محروم طبقے کو زیادہ سے زیادہ ریلیف دینے کیلئے اقدامات کررہے ہیں۔ ملکی معیشت کی بہتری کیلئے ٹھوس اقدامات کئے جارہے ہیں جس کے مثبت نتائج سامنے آئیں گے۔

ان کا مزید کہنا تھا کہ خطے میں اور بالخصوص افغانستان میں امن کی خواہش رکھتے ہیں،ہم نے خطے میں امن کیلئے بھاری قربانی دی ہے،ہماری خواہش ہے کہ افغانستان میں معاشی صورتحال نہ بگڑے،کچھ قوتیں افغانستان کے حالات خراب کرنا چاہتی ہیں۔