ملکہ برطانیہ8سال بعد ہسپتال داخل ، طبیعیت میں بہتر ی آگئی

 برطانوی میڈیا کے مطابق  ملکہ برطانیہ الزبتھ دوم کو طبیعیت  خراب ہونے کے باعث کنگ ایڈورڈ ہسپتال میں داخل  کروایا گیا تھا۔ بکنگھم پیلس سے جاری بیان میں کہا گیا  ہے کہ ملکہ برطانیہ جمعرات کی دوپہر خوش باش ونڈسر کیسل واپس آ گئیں  ۔ ملکہ برطانیہ کو بدھ کو ان کے معالج نے چند روز کے آرام کا مشورہ دیا تھا۔

غیر ملکی خبررساں ادارے  نے بکنگھم پیلس کی جانب سے جاری بیان کا حوالہ دیتے ہوئے کہا ہے کہ 95 سالہ ملکہ برطانیہ نے آئندہ چند دنوں کے لیے آرام کرنے کا طبی مشورہ ہچکچاہٹ کے ساتھ قبول کیا ہے۔ محل  کی جانب سے بیان میں کہا گیا ہے کہ ملکہ برطانیہ شمالی آئر لینڈ کا دورہ نہ کر سکنے پر مایوس ہیں جہاں انہوں نے کئی طے شدہ مصروفیات میں شرکت کرنا تھی۔

ملکہ الزبتھ دوم نے طبی وجوہات کی بنیاد پر طے شدہ دورۂ شمالی آئر لینڈ منسوخ کر دیا ہے ۔ خیال رہے کہ شمالی آئر لینڈ کے قیام کے ایک سو سال مکمل ہونے پر جمعرات کو سرحدی شہر میں تقریبات  کا انعقاد ہونا ہے ۔

برطانوی میڈیا کے مطابق یہ 2013 کے بعد پہلا موقع ہے کہ ملکہ برطانیہ کو اسپتال میں داخل کیا گیا ۔  طویل مدت تک برسرا اقتدار رہنے والی ملکہ الزبتھ دوم کورونا وائرس کے پھیلاؤ کے باعث گزشتہ سال مارچ میں ونڈسر کاسل منتقل ہو گئی تھیں۔

یہاں یہ بات قابل ذکر ہے کہ رواں ماہ  پہلی بار  ایک تقریب میں ملکہ کو  چھڑی کے سہارے چلتے ہوئے دیکھا گیا تھا ۔

دنیا کی معمر ترین ملکہ کا اعزاز حاصل کرنے والی ملکہ برطانیہ 95 سالہ الزبتھ دوم  اگلے سال شاہی تخت  کی 70ویں سالگرہ منائیں گی ۔