کالعدم جماعت کو مزید قانون شکنی پر کوئی رعایت نہیں دی جائے گی ، قومی سلامتی کمیٹی

تفصیلات کے مطابق وزیر اعظم عمران خان کی زیر صدارت قومی سلامتی کمیٹی کا اجلاس ہوا،   اجلاس میں قومی سلامتی کے اجلاس ڈی جی آئی بی اور مشیر خزانہ شوکت ترین شریک ہوئے، جبکہ ڈی جی آئی ایس آئی فیض حمید بھی وہاں موجود تھے۔وزیر خارجہ شاہ محمود قریشی، ڈی جی ایم او بھی قومی سلامتی کمیٹی کے اجلاس کا حصہ تھے ۔ اجلاس میں وزیراطلاعات ،وزیر دفاع پرویز خٹک، نیول چیف امجد خان نیازی، ائیر چیف ظہیر احمد بابر اور وزیر داخلہ اجلاس بھی اجلاس میں شریک تھے۔

کمیٹی کو ملکی داخلی صورتحال اور ٹی ایل پی کے احتجاج کے حوالے سے بریفنگ دی گئی ،کالعدم  جماعت  کے احتجاج کے دوران جان و مال کو نقصان پہنچانے پر گہری تشویش کا اظہار کیا گیا۔

قومی سلامتی کمیٹی    کی جانب سے جاری کردہ اعلامیہ میں کہا گیا ہے کہ   قانون کی عملداری میں خلل ڈالنے کی مزید کوئی رعایت نہیں دی جائے گی،  ریاست آئین و قانون کے دائرہ کار میں رہ کر مزاکرات کرے گی ۔

وزیر اعظم عمران خان نے کہا کہ کسی بھی گروپ یا عناصر  کو امن و عامہ کی صورتحال بگاڑنے اور حکومت پر دباو ڈالنے کی اجازت نہیں دی جائے گی۔

اجلاس میں فیصلہ کیا گیا ہے کہ  ٹی ایل پی کو مزید قانون شکنی پر کوئی رعایت نہیں دی جائے گی ۔کمیٹی کے اعلامیہ کے مطابق  ٹی ایل پی نے دانستہ طور پر سرکاری و نجی املاک کو نقصان پہنچایا، ٹی ایل پی کی وجہ سے دنیا بھر میں پاکستان کا منفی تاثر گیا ہے۔ کمیٹی نے ٹی ایل پی کی طرف سے ناموس رسالت کے غلط اور گمراہ کن استعمال کی شدید مذمت کی۔