آئی ایم ایف کے ساتھ معاملات طے پا گئے ہیں : شوکت ترین 

تفصیلات کے مطابق مشیر خزانہ شوکت ترین نے اسلام آباد میں ایک تقریب سے خطاب کے دوران کہا کہ  حکومت تبدیلی، اصلاحات اور احتساب کا نعرہ لے کر آئی ہے،حکومت نے ادارہ جاتی اصلاحات کے لیے اہم اقدامات کیے ہیں، سنگل ونڈو کا افتتاح اصلاحات کی جانب اہم قدم ہے۔

ان کا کہنا تھا کہ اسٹیٹ بینک سے متعلق قانون کیلئے آئینی ترامیم کی ضرورت ہے، آئینی ترامیم کیلئے ہمارے پاس دو تہائی اکثریت نہیں ہے۔

انہوں نے کہاکہ گزشتہ دو سال میں کورونا وائرس کی وبا کے باعث سپلائی چین متاثر ہوئی۔ اب معیشت بحالی کی جانب گامزن ہے، کاروباری افراد تمام مواقع سے فائدہ اٹھانے کے لیے تیار ہیں،  پاکستان سنگل ونڈو سے ملکی برآمدات میں اضافہ ہوگا، علاقائی تجارت اور جیو اکنامک روابط میں بہتری آئے گی۔

 مشیر خزانہ نے بتایا کہ  مہنگائی صرف پاکستان نہیں عالمی سطح کا مسئلہ ہے ، عالمی سطح پر قیمتیں میرے اختیار میں نہیں ہیں ، مہنگائی پر قابو پانے کیلئے ٹارگٹڈ سبسڈی دے رہے ہیں۔

سائبر حملوں سے متعلق شوکت ترین کا کہنا تھا کہ دشمن ملک ہمارے پڑوس میں بیٹھا ہے،  سرکاری ملازمین کی تنخواہیں لیٹ نہیں ہونگی اور صورتحال پر قابو پالیا گیا ہے ۔