دوسال رہا تووِدہولڈنگ ٹیکس ختم  کر دوں گا : شوکت ترین 

تفصیلات کے مطابق مشیر خزانہ  شوکت ترین نے چیمبرز آف کامرس  میں ایک تقریب سے خطاب کرتے ہوئے کہا کہ ملکی آبادی کا 60 فیصد 30 سال سے کم عمر ہے،  نوجوانوں کو ہر سولت کی فراہمی وزیراعظم عمران کا وژن ہے، کامیاب پاکستان پروگرام کے تحت 8 لاکھ سے زائد درخواستیں موصول ہوئیں، جن میں سے 2 لاکھ افراد اہل ثابت ہوئے۔ 

انہوں نے کہا کہ چھوٹی اور درمیانے درجے کی صنعت کی ترقی پر توجہ دے رہے ہیں۔ کامیاب جوان پروگرام کو ٹھیک استعمال کیا گیا تو پاکستان میں ترقی ہو گی۔ 

مشیر خزانہ نے کہا کہ  ساٹھ کی دہائی میں پاکستان چوتھی بڑی معاشی طاقت تھا، معاشی طاقت کو واپس لانا ہے اور عالمی اداروں پر انحصار ختم کرنا ہے،  ٹیکس کے بغیر ترقی نہیں کرسکتے، ٹیکس دہندگان کو کوئی ہراساں نہیں کرے گا، لیکن ٹیکس سب کو دینا ہوگا، یہ بھول جائیں کہ ٹیکس نہیں دینا۔ 

ان کا کہنا تھا کہ ہمارے پاس سب کے بلز، بینک اکاؤنٹس، گاڑیوں، سفری معلومات، رہائش گاہوں وغیرہ کی تفصیلات آگئی ہیں، اب ہم آرٹیفیشل انٹیلیجنس کا استعمال کر کے آمدن کا تخمینہ لگائیں گے اور ٹیکس کا بل بھیجیں گے۔

شوکت ترین نے کہا کہ سیلف اسسٹمنٹ ہے، آپ خود اپنے ریٹرنز بھریں، آپ کو کوئی تنگ نہیں کرے گا، اگر کوئی اختلاف ہوا تو تھرڈ پارٹی آڈٹ ہوگا، ایف بی آر والے آڈٹ بھی نہیں کریں گے۔

شوکت ترین نے کہا کہ اگلے دو سال میں صرف دو ٹیکسز انکم ٹیکس اور جی ایس ٹی لاگو ہوں گے باقی تمام  ودہولڈنگ ٹیکس، ٹرن اوور ٹیکس کو آئندہ 2 سے 3 سال میں ختم کردیا جائے گا۔

مشیر خزانہ نے کہا کہ کامیاب پاکستان پروگرام کے ایک اور اقدام کے تحت سود سے پاک زرعی اور کاروباری قرضے بھی فراہم کئے جارہے ہیں جو تقریبا چالیس لاکھ پسے ہوئے خاندانوں کی بہتری کیلئے شروع کئے گئے ہیں۔

اس موقع پر اظہار خیال کرتے ہوئے نوجوانوں کے امور کے بارے میں وزیراعظم کے معاون خصوصی عثمان ڈار نے کہا کہ کامیاب جوان پروگرام کے تحت نوجوانوں میں 30 ارب روپے تقسیم کئے گئے ہیں۔ انہوں نے کہا کہ دوہزار تئیس تک باقی ستر ارب روپے تقسیم کئے جائیں گے۔