پی پی پی اور پی ڈی ایم ایک بار پھر آمنے سامنے آگئے

تفصیلات کے مطابق  پی پی رہنما قمرزمان کائرہ کے بیان پر ترجمان پی ڈی ایم حافظ حمداللہ کاردعمل سامنے آگیا ہے،ترجمان پاکستان ڈیموکریٹک مومنٹ (پی ڈی ایم ) حافظ حمداللہ کا کہنا ہے کہ  پی ڈی ایم پی پی پی کے بغیر بحال بھی، فعال بھی اورمیدان عمل میں بھی ہے،  پیپلزپارٹی نے سینٹ میں اپوزیشن لیڈرکے عہدے کے حصول کےلئے پی ڈی ایم کی پیٹ میں چھراگھونپا، جس دن پی پی سینٹ سے اپوزیشن لیڈر کا نوٹیفیکیشن حاصل کر رہی تھی اسی دن جاتی امراء میں ناشتہ میں بھی شریک تھی۔

حافظ حمداللہ نے کہا کہ  قمرزمان کائرہ اور پی پی پی یہ بتائیں کیا یہ ایک ٹکٹ میں دومزے لینے کی کوشش نہیں تھیں،  قوم کو بتایا جائے کہ کیا یوسف رضاگیلانی پی ڈی ایم کے ووٹوں سے سنیٹر نہیں بنا؟  پی پی پی نے صادق سنجرانی کوجتوایا اور غفورحیدری کو ہروایا کیا ایسانہیں تھا؟۔

قبل ازیں پیپلزپارٹی رہنما قمرزمان کائرہ کا کہنا تھا کہ  لاہور کے بے تاج بادشاہ کہتے ہیں کہ حکومت 5سال پورے کرے، جب  عدم اعتماد کی بات کرتے ہیں تو کہتے ہیں کہ ہمیں یہ حکومت سوٹ کرتی ہے، اگر یہ ووٹ کو عزت دو کےساتھ مخلص ہیں تو بیک ڈور رابطے ختم کریں،  ریاستی اداروں سے گفتگو بند کی جائے،اپنی جماعت کو تو ایک پیج پر لے آئیں،  ان کے اپنے گھر میں لوگ کہہ رہے ہیں کہ بات چیت کے دروازے بند نہیں کرنے، تو بات چیت کے دروازے کس سے بند نہیں کرنے۔ان کا کہنا تھا کہ  پی ڈی ایم عملاً ختم ہو چکی ہے،  پیپلز پارٹی کے جانے کے بعد پی ڈی ایم کی جان ختم ہو گئی،  ہم پی ڈی ایم میں تھے توحکومت لڑکھڑا رہی تھی،اعتماد کا ووٹ لینے پر مجبورتھی۔