ن لیگ کا سابق جج رانا شمیم کے انکشافات کا معاملہ پارلیمنٹ میں اٹھانے کا فیصلہ

تفصیلات کے مطابق سابق وزیراعظم شاہد خاقان عباسی نے مسلم لیگ ن کے رہنما خواجہ آصف کے ہمراہ  پریس کانفرنس کرتے ہوئے کہا ہے کہ سابق جج رانا شمیم نے بغیر کسی دباؤ کے حلفیہ بیان دیا ہے۔

شاہد خاقان عباسی کا کہنا تھا کہ نواز شریف کو نااہل کرکے سیاست سے علیحدہ کر دیا گیا، ثاقب نثار اور رانا شمیم سمیت تین افراد کو حقیقت کا علم ہے لیکن پاکستان کے عوام کو بھی سچ پتا چلنا چاہیے، الیکشن کے عمل میں مداخلت ہو تو کیا ہم پوچھنے کا حق نہیں رکھتے؟

سابق وزیر اعظ٘م کا کہنا تھا اگر ملک کا چیف جسٹس ملوث ہو تو انصاف کہاں سے ملے گا؟ دعا ہے کہ اس معاملے میں ثاقب نثار ملوث نہ ہوں، ملک کے نظام میں غیر آئینی مداخلت ہے، ثاقب نثار نے اسپتالوں کے دورے کیے، ڈیم بنانے کی کوشش کی، ہمیں رانا شمیم کے بیان پریقین کرنا پڑے گا۔

خواجہ آصف نے سابق جج رانا شمیم کے انکشافات کا معاملہ پارلیمنٹ میں اٹھانے کا اعلان کرتے ہوئے کہا کہ ہم قانونی کارروائی کے لیے بھی مشاورت کریں گے۔