اسلام آباد ہائیکورٹ کا سابق چیف جسٹس جی بی رانا شمیم کے انکشافات کا نوٹس

تفصیلات کے مطابق اسلام آباد ہائیکورٹ  نے سابق چیف جسٹس  گلگت بلتستان  رانا شمیم کے انکشافات کا نوٹس لے لیا ہے، اسلام آباد ہائیکورٹ نے سابق چیف جسٹس  جی بی رانا شمیم کو توہین عدالت کا نوٹس جاری کردیا۔عدالت نے خبر دینے والے صحافی اوراخبار کے  مالک کو بھی نوٹس جاری کردیا۔فریقین کل صبح 10 بجے ذاتی حیثیت میں طلب کرلیے گئے ۔اسلام آباد ہائیکورٹ نے اٹارنی جنرل آف پاکستان کو بھی بلالیا۔

قبل ازیں  سابق چیف جسٹس گلگت بلتستان سپریم کورٹ رانا شمیم کا کہنا تھا کہ سپریم کورٹ کے سابق چیف جسٹس ثاقب نثار کو میری مدت ملازمت میں توسیع کا کوئی اختیار نہیں تھا۔

سابق چیف جسٹس سپریم کورٹ جسٹس ثاقب نثار نے اپنے بیان میں کہا تھا کہ رانا شمیم بطور چیف جسٹس گلگت بلتستان ایکسٹینشن مانگ رہے تھے جو میں نے منظورنہیں کی اور ایک مرتبہ رانا شمیم نے مجھ سے توسیع نا دینے کا شکوہ بھی کیا تھا۔

سابق چیف جج گلگت بلتستان رانا شمیم نے سابق چیف جسٹس پاکستان ثاقب نثار کے الزامات کا جواب دیتے ہوئے کہا کہ ثاقب نثار گلگت میں میرے مہمان تھے، میں نے ثاقب نثار کے گلگت آنے پر کوئی سرکاری خرچ نہیں کیا تھا اور خبر میں دی گئی تمام باتوں پر قائم ہوں۔  

انہوں نے کہا کہ گلگت بلتستان اور آزاد کشمیر کی سپریم کورٹ میں چیف جسٹس کو ایکسٹینشن دینا وزیراعظم کا اختیار ہے، میں کوئی سیاسی شخصیت نہیں جو سیاسی بیانات دوں، جو بھی حقائق معلوم تھے سامنے لے آیا۔

انہوں نے مزید کہا کہ مجھے مدت ملازمت میں توسیع مانگنے کی کوئی ضرورت محسوس ہی نہیں ہوئی اور سابق چیف جسٹس ثاقب نثارکے پاس قانون کے مطابق مجھے توسیع  دینے کا اختیار ہی نہیں تھا، ثاقب نثار کون ہوتے ہیں مجھے توسیع دینے والے؟

رانا شمیم نے مزید کہا کہ حلف نامہ کب اور کس کو دیا یہ ابھی نہیں بتا سکتا لیکن گلگت بلتستان اور آزاد کشمیر کی سپریم کورٹس، سپریم کورٹ آف پاکستان کے ماتحت نہیں ہیں۔