حکومت کا چیف الیکشن کمشنر سے سپریم کورٹ کے فیصلے پر عملدرآمد کا مطالبہ

جی این این کے مطابق سینیٹ الیکشن سے متعلق سپریم کورٹ کی رائے کے بعد حکومتی وزرا الیکشن کمیشن پہنچ گئے۔ وزرا میں فواد چودھری، بابر اعوان اور معاون خصوصی احتساب شہزاد اکبر، سینیٹر فیصل جاوید اور معاون خصوصی شہباز گل شامل تھے۔چیف الیکشن کمشنر  سے ملاقات کے بعد دیگر وفاقی وزرا کے ہمراہ میڈیا کو بریفنگ دیتے ہوئے  وفاقی وزیر تعلیم شفقت محمود نے کہا کہ سپریم کورٹ کا فیصلہ ہمارے موقف کی تائید ہے، ہم نے چیف الیکشن کمشنر کو بتایا کہ کرپشن کی فضا کو ختم کرنا کیوں ضروری ہے اور اس کیلئے سپریم کورٹ کے فیصلے پر عمل کیا جائے۔

انہوں نے کہا قانون میں کلیئر انداز میں لکھا ہے کہ الیکشن کمیشن کا فریضہ ہے کہ ایسا انتخاب کرائے جس میں بد عنوانی نہ ہو۔ ہمیں الیکشن کمیشن پر مکمل اعتماد ہے، ہمارا خیال ہے کہ وہ شفاف انتخاب یقینی بنائے گا،  ہمیں امید ہے کہ عمران خان کے ویژن کے مطابق الیکشن ہوں گے۔

اس موقع پر وزیر اعظم کے معاون خصوصی بابر اعوان نے کہا کہ الیکشن کمیشن زمینی حالات کے مطابق ووٹ سیکریسی کے بارے میں فیصلہ کرسکتا ہے۔ سینیٹ انتخابات میں ووٹوں کی خرید و فروخت کی ویڈیو سب کے سامنے ہے۔انہوں نے کہا کہ الیکشن کمیشن کے پاس انتخابات کرانے کے حوالے سے 5 اختیارات ہیں اور شفاف الیکشن کرانا الیکشن کمیشن کی ذمہ داری ہے۔ شفاف الیکشن کے لیے پاکستان کی تاریخ میں پہلا موقع ہے۔

واضح رہے کہ سپریم کورٹ نے صدارتی ریفرنس پر اپنی رائے سنا دی ، سپریم کورٹ کی جانب سے کہا گیا کہ سینٹ الیکشن آئین کے آرٹیکل 226 کے تحت ہونگے، اور الیکشن کیلئے خفیہ ووٹنگ ہوگی۔ سپریم کورٹ کا کہنا تھا کہ ووٹ ہمیشہ خفیہ نہیں رہ سکتا، الیکشن کمیشن شفاف الیکشن کیلئے تمام اقدامات کر سکتا ہے، انتخابی عمل سے کرپشن ختم کرنا الیکشن کمیشن کی ذمہ داری ہے، تمام ادارے الیکشن کمیشن کےساتھ تعاون کے پابند ہیں۔