آئندہ الیکشن ہر صورت ای وی ایم پر ہی کرائیں گے،  وزیراعظم

وزیراعظم عمران خان کی زیر صدارت ترجمانوں کا اجلاس ختم،اندرونی کہانی سامنے آگئی ، اجلاس میں  سابق چیف جسٹس ثاقب نثار کی مبینہ آڈیو لیک معاملے پر بحث کی گئی۔ وزیراعظم نے ترجمانوں کو ن لیگ کی ماضی کی تاریخ اجاگر کرنے کی ہدایت کر دی۔وزیر اعظم نے ہدایت کی کہ  عوام کو بتایا جائے کہ شریف فیملی کیسے ججز پر حملے کرتی رہی ہے۔

وزیر اعظم عمران خان نے کہا کہ  یہ مافیا ہے جو اپنے مرضی کے فیصلے لینے کے لیے ججز پر دباو ڈالتا ہے،  ان کے ایسے ہتھکنڈے اب ملک پر نہیں چلیں گے، حکومت اداروں کا احترام کرتی اور ان کے ساتھ کھڑی ہے۔  ماضی میں بھی یہ مافیا عدلیہ پر حملہ آور ہوتے رہے۔

وزیراعظم عمران خان آئندہ الیکشن الیکٹرانک ووٹنگ مشین پر کرانے کے لیے پرعزم، وزیراعظم کی ای وی ایم سے متعلق عوام کو اعتماد میں لینے کی ہدایت، وزیر اعظم کا کہنا تھا کہ  آئندہ الیکشن ہر صورت ای وی ایم پر ہی کرائیں گے۔ اوورسیز کے ووٹ میں جو جو رکاوٹیں ہیں دور کی جائیں، بیرون ملک پاکستانیوں کے پاسپورٹ اور نائیکوپ کے ایشوز کو جلد حل کیا جائے۔حکومت نے اوورسیز کےساتھ جو وعدہ کیا ہر صورت پورا کریں گے۔

ترجمانوں کے اجلاس میں بھی مہنگائی پر بات چیت کی گئی۔وزیر اعظم عمران خان کا کہنا تھا کہ  مہنگائی گلوبل ایشو ہے، حکومت عوام کو ریلیف کے لیے اقدامات اٹھا رہی، عوام کو دنیا بھر میں مہنگائی سے متعلق اعدادوشمار پر اعتماد میں لیں۔