آئی ایم ایف  سے ہمارے مذاکرات طے پاگئے ہیں:شوکت ترین

تفصیلات کے مطابق مشیر خزانہ شوکت ترین کا وفاقی وزیر توانائی حماد اظہر کے ہمراہ میڈیا سے گفتگو کرتے ہوئے کہنا تھا کہ پاکستان اور آئی ایم ایف کے درمیان مزاکرات طے پاگئے ہیں۔

ان کا کہنا تھا کہ آئی ایم کے ساتھ تبادلہ خیال ہو رہا تھا لیکن یہ ایک اسٹاف معاہدہ کامیابی سے اختتام پذیر ہوا ہے، چھٹے جائزہ اجلاس کے مطابق آئی ایم ایف پاکستان کو تقریباً ایک ارب ڈالر دے گا، جس کے بعد مجموعی 3 ارب ڈالر ہوجائیں گے جو انہوں نے ہمیں دیے ہیں۔

شوکت ترین نے کہا کہ آئی ایم ایف نے ایک طرح سے تسلیم کیا ہے کہ کووڈ کے باوجود حکومت پاکستان کی معاشی ترقی جاری ہے اور اصلاحات کے ایجنڈے پر کامیابی سے عمل کر رہے ہیں۔

ان کا کہنا تھا کہ بجلی کے نرخ میں ایڈجسٹمنٹ، ٹیکس کے نظام میں بہتری، اخراجات میں احتیاط اور مالیاتی نظم و ضبط وہ چند اہم اقدامات ہیں جن سے ملک کو ٹھوس معاشی بنیادوں پر استوار کرنے میں مدد ملے گی۔

حماد اظہر نے میڈیا سے گفتگو کرتے ہوئے کہا کہ چند ماہ میں بجلی پر ٹیرف بڑھانا پڑے گا، ٹیرف بڑھانے پرہم  نے پچھلے ماہ عمل بھی کیا، آئی ایم ایف نے تسلیم کیا کہ انرجی کے شعبے میں خاطر خواہ کام ہوا ہے۔

ان کا کہنا تھا کہ آئی ایم ایف سے معاہدے کے بعد معاشی صورتحال بہتر ہوگی، چند ماہ میں شاید بجلی کی قیمتیں بڑھانا پڑیں گی۔