سپریم کورٹ کا وکلاء کے تمام غیر قانونی چیمبرزگرانے کاحکم

تفصیلات کے مطابق سپریم کورٹ میں چیف جسٹس پاکستان  جسٹس گلزار احمد  کی سربراہی میں فٹبال گراؤنڈ میں وکلا کے غیر قانونی چیمبرز سے متعلق کیس کی سماعت ہوئی۔ چیف جسٹس پاکستان نے کہا کہ کس بنیاد پر غیرقانونی چیمبرز کو برقرار رہنے دیں؟ وکلا کا فٹبال گراؤنڈ پر کوئی حق دعویٰ نہیں،  وکلا کی یہ پٹیشن خارج کی جاتی ہے۔ اسلام آباد ہائیکورٹ  حملہ معاملہ ختم کرنا ہے تو حملہ کرنیوالے وکلا کے نام دیں.۔  عدالتوں کے وکلا کے وکیل حامد خان نے عدالت سے کہا کہ فٹبال گراؤنڈ خالی کرنا چاہتے ہیں لیکن عدالت مناسب وقت دے، جب اسلام آباد ہائیکورٹ ریڈ زون میں شفٹ ہوجائے گا تو ہم چیمبرز خالی کردیں گے، ہم عدالت میں چیمبرز خالی کرنے کا بیان حلفی جمع کرائیں گے،  ایک سے 2 سال میں چیمبرز خالی کردیں گے۔

اس پر جسٹس گلزار احمد نے کہا کہ  اتنا لمبا وقت نہیں دے سکتے، وکلا چاہتے ہیں تو 2 ماہ کا وقت دے دیتے ہیں جگہ خالی کرکے انتظامیہ کودیں۔ چیف جسٹس نے کہا کہ جو عدالتیں گراؤنڈ کی زمین پر بنی ہوئی ہیں وہ بھی گرا دیں،  جس نے پریکٹس کرنی ہے اپنا دفتر کہیں اور بنالے۔ عدالت نے وکلا کی متبادل جگہ ملنے تک وقت دینے کی استدعا مسترد کرتے ہوئے اسلام آباد بار کی درخواست خارج کردی۔  سپریم کورٹ نے  غیرقانونی چیمبرز مسمار کرنے کا اسلام آباد ہائیکورٹ کا حکم برقرار رکھتے ہوئے  وکلا سے فٹبال گراؤنڈ فوری طور پر خالی کرانے اور تمام غیرقانونی چیمبرز گرانے کا حکم دے دیا۔

اس سے قبل جمعہ کے روز  سپریم کورٹ   نے وکلاء کے غیر قانونی  چیمبرز  کو مسمار کرنے کے خلاف اپیل کی سماعت کرتے ہوئے کہا تھا کہ عدالت کوئی بھی فیصلہ کسی  بھی دباؤ میں  نہیں لے گی۔