بجلی کی قیمتوں میں 4 روپے 75 پیسے فی یونٹ اضافے کا امکان

ذرائع  کے مطابق سنٹرل پاور پرچیزنگ ایجنسی (سی پی پی اے ) نے بجلی کی قیمتوں میں اضافے کی درخواست دے رکھی ہے ،  بجلی کی قیمتوں میں اضافے کی درخواست ماہانہ فیول پرائس ایڈجسٹمنٹ کی مد میں دی گئی۔

ذرائع کے مطابق سنٹرل پاورپرچیزنگ ایجنسی نے درخواست میں موقف اختیار کیا ہے کہ کہ اکتوبر میں ڈیزل سے 25 روپے 22 پیسے فی یونٹ بجلی پیدا کی گئی ۔ فرنس آئل سے 22 روپے 21 پیسے فی یونٹ بجلی پیدا کی گئی۔ پانی سے بجلی کی پیداوار 23.26 فیصد، کوئلے سے 16.69فیصد رہی ۔ فرنس آئل سے 10.88 اور ڈیزل سے پیداوار0.51 فیصد رہی۔ گزشتہ ماہ گیس سے 9.67 اور ایل این جی سے 23.96 فیصد بجلی پیدا کی گئی۔

اسی ماہ میں ماہانہ فیول ایڈجسٹمنٹ کی مد میں حکومت نے بجلی کی قیمتوں میں 2 روپے 52 پیسے فی یونٹ اضافہ کیا تھا۔

نیشنل الیکٹرک پاور ریگولیٹری اتھارٹی (نیپرا) کی جانب سےجاری نوٹی فیکیشن کےمطابق اضافہ ستمبرکی ماہانہ فیول ایڈجسٹمنٹ کی مد میں کیا گیا ہے جو نومبر2021 کے بلوں میں وصول کیا جائے گا۔

اضافے کا اطلاق کے الیکٹرک اور لائف لائن صارفین پرنہیں ہوگا، تاہم دیگر صارفین پر حالیہ اضافے سے40ارب روپےکااضافی بوجھ پڑے گا۔

نیپرا اتھارٹی سی پی پی اے کے اعداد و شمار کا جائزہ لیکر فیصلہ کرے گی۔