وزیر اعلیٰ سندھ نے عوام کو راشن کے بجائے صرف بھاشن دیا:مراد سعید

تفصیلات کے مطابق و فاقی وزیر مواصلات مراد سعید کا کراچی میں ورکرز کنونشن سے خطاب کرتے ہوئے کہنا تھا کہ پرچی چیئرمین بہت جمہوریت کی بات کرتے ہیں لیکن کراچی شہر کو پیپلز پارٹی نے خراب کر دیا ہے اور ہم اگر سوال کرتے ہیں تو یہ ناراض ہو جاتے ہیں۔

مراد سعید کا کہنا تھا کہ سندھ کے اسکولوں میں طلبہ نہیں بلکہ بھیڑ اور بکریاں نظر آتی ہیں جبکہ سندھ میں سانپ اور کتے کے کاٹنے کی ویکسین تک نہیں ملتی،سندھ میں 70 فیصد لوگ گندا پانی پینے پر مجبور ہیں۔

ان کا کہنا تھا کہ اگر وفاقی حکومت سندھ میں کام کرے تو ان کو کرپشن کا موقع نہیں ملے گا،سندھ میں تعلیم اور صحت کی بھی ابتر صورتحال ہے۔

وفاقی وزیر مواصلات کا کہنا تھا کہ وزیر اعظم عمران خان نے کورونا کے خلاف بہترین حکمت عملی اپنائی،ملک کے دیگر علاقوں میں چینی 90 روپے لیکن کراچی میں 140 روپے فی کلو ہے جبکہ کراچی میں وفاق کے فنڈ سے ترقیاتی کام جاری ہیں۔

ان کا مزید کہنا تھا کہ کراچی میں آٹے کا 20 کلو کا تھیلا ایک ہزار 440 روپے اور پنجاب میں 11 سو روپے کا ہے،وفاقی حکومت آٹا، گھی اور دالوں پر 30 فیصد سبسڈی بھی دے گی۔