مختلف ٹریفک حادثات میں 2 افراد جاں بحق ،22 زخمی

تفصیلات کے مطابق صوبہ پنجاب کے شہر  خانیوال میں  موٹر وے پر  تیز رفتار اے سی بس ٹرالر سے جا ٹکرائی،  جس کے نتیجے  میں ایک شخص جاں بحق جبکہ  17 شدید زخمی  ہوگئے ۔ حادثے کی اطلاع ملتے ہی ریسکیو اورامدادی ٹیمیں موقع پر پہنچ گئیں اور شدید زخمیوں افراد  کو  ہسپتال منتقل کردیا گیا ۔

ایک اور  افسوس ناک حادثہ کراچی سے سکھر جانے والی مسافر کوچ  کو نوری آباد کے قریب  پیش آیا جہاں مسافر کوچ تیز رفتاری میں اوور ٹیک کرتے ہوئے ٹرالر میں پیچھے سے جا کر لگی ۔ حادثے کے نتیجے میں سکھر کا رہائشی مسافر موقع پر دم توڑ گیا جبکہ پانچ افراد شدید زخمی ہوگئے ۔ موٹر وے پولیس نے موقع پر پہنچ کر زخمیوں  اور لاشوں کو لیاقت میڈیکل  اسپتال  جامشورو  منتقل کر دیا۔ موٹروے پولیس کے مطابق  حادثہ غلط اوور ٹیکنگ کی وجہ سے پیش آیا۔

واضح رہے کہ عالمی ادارہ صحت کے مطابق پاکستان میں سالانہ 35 ہزار لوگ سڑک حادثات  میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا  جاں بحق ہوجاتا ہے۔