آسٹریلیا ملک بدری ، ٹینس اسٹار نوواک جوکووچ  کیس جیت گئے

تفصیلات کے مطابق  ٹینس اسٹار نوواک جوکووچ کی آسٹریلیا میں داخلے کے کیس کی سماعت ہوئی، آسٹریلوی عدالت نے حکومت کو ٹینس اسٹار نوواک جوکووچ کو ہرجانہ ادا کرنے کا بھی حکم دے دیا۔ 

 آسٹریلوی عدالت نے فیصلے میں کہا کہ  حکومت ٹینس اسٹار کا ویزا منسوخ کرنے کی درست دلیل دینے میں ناکام رہی ہے لہذا جوکووچ کے ویزا منسوخی کا حکم منسوخ کردیا گیا ہے، جوکووچ کا ویزا درست ہے اور وہ آسٹریلیا میں داخل ہو سکتے ہیں۔

 حکومتی وکیل کا عدالتی فیصلے پر کہنا ہے کہ آسٹریلیا کے امیگریشن وزیر جوکووچ کا ویزا دوبارہ منسوخ کرنے پر غور کر سکتے ہیں، امیگریشن قانون کے تحت وزیر کو ویزا منسوخ کرنے کے غیرمعمولی اختیارات حاصل ہیں۔

آسٹریلوی میڈیا رپورٹس میں کہا گیا ہے کہ  آسٹریلوی ضوابط کے مطابق اگر کسی شخص کو آسٹریلیا سے ڈی پورٹ کر دیا جائے، تو اسے اگلے تین برسوں تک عارضی ویزا بھی جاری نہیں ہو سکتا۔ تاہم اس حوالے سے بہرحال کچھ استثنائی حالات ہو سکتے ہیں۔ 

خیال رہے کہ آسٹریلیا نے بدھ کے روز کورونا وائرس کے سخت قوانین کو پورا نہ کرنے پر عالمی نمبر ایک ٹینس کھلاڑی نوواک جوکووچ کا ویزا منسوخ کرکے انہیں ڈی پورٹ کرنے کا فیصلہ کیا تھا۔

جوکووچ بدھ کو سال کے پہلے گرینڈ سلم ٹینس ٹورنامنٹ آسٹریلین اوپن میں شرکت کیلئے میلبورن پہنچے تو ائیرپورٹ حکام نے ویکسین سے استثنیٰ اور غلط ویزے کی بنیاد پر داخلے سے روک دیا ۔ ویزا منسوخ کرکے انہیں سرکاری ہوٹل میں حراست میں رکھا گیا تھا، اس اقدام کے خلاف جوکووچ کے وکلا نے عدالت میں اپیل دائر کی تھی۔