مشترکہ مفادات کونسل نے نئی مردم شماری کرانے کی منظوری دے دی

تفصیلات کے مطابق وزیر اعظم عمران خان کی زیرِ صدارت مشترکہ مفادات کونسل کا اجلاس ہوا، جس میں چاروں صوبوں کے وزرائے اعلیٰ اور دیگر ارکان نے شرکت کی۔

اجلاس میں ساتویں مردم شماری کے انعقاد، مشترکہ مفادات کونسل کے مستقل سیکرٹریٹ کے قیام کا سندھ طاس معاہدے سے متعلق اٹارنی جنرل کی سفارشات کا جائزہ لیا گیا۔

اجلاس کے بعد جاری ہونے والے اعلامیے کے مطابق مشترکہ مفادات کونسل نے ملک میں ساتویں مردم شماری کرانے کی منظوری دے دی، مردم شماری ڈیجیٹل ٹیکنالوجی کے ذریعے ہوگی۔ مردم شماری سے قبل خانہ شماری کرائی جائے گی۔

مشترکہ مفادات کونسل نے مردم شماری مانیٹرنگ کمیٹی کے قیام کی منظوری بھی دے دی۔ کمیٹی کی سربراہی ڈپٹی چیئرمین پلاننگ ،چیف سیکریٹریز،چیئرمین نادرا و دیگر کریں گے، کمیٹی مردم شماری کی سرگرمیوں کی نگرانی کرے گی۔

اس موقع پر وزیراعظم نے کہا کہ تمام وفاقی اکائیوں اور اسٹیک ہولڈرز کی مشاورت سے قومی مسائل کے حل کے لئے پرعزم ہیں۔

وزیراعظم نے مشترکہ مفادات کونسل کے مستقل سیکریٹریٹ کے قیام پر ارکان کو مبارکباد دیتے ہوئے کہا کہ مستقل سیکریٹریٹ وفاقی اور صوبائی حکومتوں کے درمیان تعاون کے جذبے کو ظاہر کرتا ہے۔

وزیر اعظم نے کہا کہ صوبوں کے مطالبات کے مطابق مشترکہ مفادات کونسل اجلاسوں کی تعداد میں اضافہ کیا جا سکتا ہے۔

وزیر اعظم عمران خان کا مزید کہنا تھا کہ حکومت مردم شماری کا قابل اعتبار ڈیٹا حاصل کرنا چاہتی ہے، شہریوں کی فلاح و بہبود کے لیے پالیسیوں اور منصوبوں کو شروع کرنے کے لیے استعمال کیا جائے گا۔