سعودی عرب نے کفالت کے نظام میں خوش آئند تبدیلی کردی

غیر ملکی خبررساں ادارے کے مطابق مزدوروں کے حوالے سے  اصلاحات اتوار سے نافذ العمل ہوں گی۔ جس  کے بعد  لاکھوں مزدور  اور غیر ملکی ملازمین کو نوکریوں سے متعلق آزادی مل جائے گی۔ان اصلاحات کے بعد غیر ملکی ملازمین اپنی نوکریاں بدل سکیں گے اور آجر کی مرضی کے بغیر بھی ملک چھوڑ سکیں گے۔

سعودی عرب کی جانب سے اس  اقدام کے بعد غیر ملکی ملازمین کو حکومتی شعبوں میں بھی نوکری کے لیے اپنی ملازمت کے ڈیجیٹل کاغذات کے ساتھ براہ راست درخواست دینے کی اجازت دی گئی ہے۔

سعودی عرب  کی اس لیبر ریفارم انیشیٹو (ایل آر آئی) کے تحت ہونے والی تبدیلیوں سے تقریبا ایک کروڑ غیر ملکی ملازمین مستفید ہونگے اور  غیر ملکی ملازمین کو سعودی عرب میں رہائش کا درجہ حاصل کرنے میں مدد ملے گی۔

 نئی اصلاحات میں غیر ملکی ملازمین  کو ایک کمپنی سے دوسری کمپنی میں ملازمت کی اجازت دی گئی ہے۔ غیر ملکی ملازمین کو ملک سے باہر جانے اور واپس آنے کی بھی سہولت ہو گی۔

دوسری جانب غیر ملکی ملازمین نے ان اصلاحات پر خوشی کا اظہار کرتے ہوئے کہا ہے کہ ان کو روزگار کے انتخاب میں اب آسانی ہوگی۔

سعودی عرب میں پانچ سال سے مقیم ایک ورکر کا کہنا ہے کہ  جب سے میں سعودی میں کام کر رہا ہوں یہ سب سے بہترین چیز ہے جو ہوئی ہے۔یہ ایک بہت بڑی پیشرفت ہے اور اس سے بہت سارے لوگوں کو مدد ملے گی۔