عمران خان کےسرپرائز سے پہلے ہم انہیں سرپرائز دیں گے :شہباز شریف

تفصیلات کے مطابق مسلم لیگ ن کے صدر شہباز شریف کا کہنا تھا کہ اسپیکر قومی اسمبلی آئین سے انحراف کے مرتکب ہو چکے ہیں، تحریک عدم اعتماد ہر حوالے سے کامیاب ہو گی۔

انہوں نے کہا ہےکہ عوامی مطالبے پر تحریک عدم اعتماد پیش کر رہے ہیں، عوام کو جلد کرپٹ حکومت سے چھٹکارا مل جائے گا۔

ان کا کہنا تھا کہ ن لیگ کی حکومت عوام کے ووٹ سے بنی تھی، ہماری حکومت میں عمران نیازی نے کیا کچھ نہیں کیا، عمران نیازی نے ڈی چوک بلاک کیا چینی صدر کا دورہ ملتوی کرایا جب کہ اپوزیشن نے اپنی تمام مصروفیات ترک کرکے او آئی سی اجلاس کرایا۔

شہباز شریف کا کہنا تھا کہ متحدہ اپوزیشن نے او آئی سی کے مہمانوں کو خوش آمدید کہا، عمران نیازی کہتا تھا آج امپائر کی انگلی اٹھنے والی ہے، کیا یہ اپنے کنٹینر والے دن بھول گئے۔

انہوں نے کہا ہے کہ نیازی صاحب کس منہ سے ہارس ٹریڈنگ اور بےضمیری کی بات کرتے ہیں، عمران خان کی پالیسی ہے نہ رہے بانس نہ بجے بانسری۔

ان کا کہنا تھا کہ مارچ اسلام آباد پہنچنے سے پہلے عمران نیازی کا بستر گول ہوجائے گا،اپوزیشن کوئی بھی غیرآئینی اقدام نہیں ہونے دے گی،کوئی غیرآئینی اقدام ہوا تو عمران خان خوش ہوں گے۔