وزیر اعلیٰ پنجاب کا انتخاب 16 اپریل کو ہوگا،لاہور ہائی کورٹ کا حکم

تفصیلات کے مطابق وزیر اعلیٰ پنجاب کے انتخاب سے متعلق درخواستوں پر لاہور ہائی کورٹ نے فیصلہ سنا دیا۔

چیف جسٹس لاہور ہائی کورٹ امیر بھٹی نے فیصلہ سنایا جس میں حکم دیا کہ تمام فریقین غیر جانبداری سے فرائض انجام دیں۔

میڈیا ذرائع کے مطابق لاہور ہائی کورٹ نے حمزہ شہباز کی سیشن کی تاریخ تبدیل کرنے کی استدعا مسترد کر دی ہے۔

حمزہ شہباز کی جانب سے وزیر اعلیٰ پنجاب کا انتخاب جلد کروانے کی درخواست کی گئی تھی جس کو مسترد کرتے ہوئے لاہور ہائی کورٹ نے حکم دیا ہے کہ وزیر اعلیٰ پنجاب کا انتخاب 16 اپریل کو ہی ہو گا۔

دوسری جانب لاہور ہائی کورٹ نے ڈپٹی اسپیکر دوست محمد مزاری کے اختیارات بھی بحال کر دیے ہیں۔

ڈپٹی اسپیکر کی جانب سے اختیارات سلب کرنے کے خلاف درخواست کی سماعت کرتے ہوئے ڈپٹی اسپیکر کے اختیارات بحال کیے ہیں۔

عدالتی فیصلے کے مطابق ڈپٹی اسپیکر پنجاب اسمبلی 16 اپریل کو اجلاس کی صدارت کریں گے۔ 

عدالتی فیصلے میں حکم دیا گیا ہے کہ اسپیکر قانون کے مطابق 16 اپریل کو وزیر اعلیٰ کا شفاف الیکشن کروائیں۔

عدالت نے کہا کسی قسم کی غفلت برداشت نہیں کی جائے گی، اس ضمن میں سیکریٹری پنجاب اسمبلی کو 15 اپریل تک تمام انتظامات مکمل کرنے کا کہا گیا ہے۔

واضح رہے کہ 5 اپریل کو پنجاب اسمبلی کا اجلاس ڈپٹی اسپیکر دوست محمد مزاری کی صدارت میں ہوا تھا جب انہوں نے اجلاس 16 اپریل تک مؤخر کرنے کی منظوری دی تھی۔

اجلاس مؤخر کرنے سے متعلق بتایا گیا تھا کہ اپوزیشن اراکین کی جانب سے ایوان میں توڑ پھوڑ کی گئی جس کے بعد مرمت کے لیے وقت درکار ہے، اس لیے اسمبلی کا اجلاس 16 اپریل کو صبح ساڑھے 11 بجے ہوگا۔

یہ بھی واضح رہے کہ عثمان بزدار کے استعفے کے بعد وزیر اعلیٰ پنجاب کے لیے اپوزیشن کے حمایت یافتہ حمزہ شہباز اور تحریک انصاف کی طرف سے نامزد امیدوار چودھری پرویز الٰہی کے درمیان الیکشن ہوگا۔