امریکہ کا یوکرین کیلئے 80 کروڑ ڈالر کی فوجی امداد کا اعلان

غیر ملکی خبر رساں ایجنسی کے مطابق وائٹ ہاؤس کے روزویلٹ روم سے امریکیوں سے خطاب میں جوبائیڈن نے کیف کے لیے اضافی امداد فراہم کرنے کے لیے کانگریس سے مزید فنڈنگ کا مطالبہ کرتے ہوئے بھاری توپیں، درجنوں ہاؤٹزر، اور گولہ بارود کے 14 لاکھ 4 ہزار راؤنڈز کے ساتھ ساتھ ٹیکٹیکل ڈرونز یوکرین بھیجنے کا اعلان کیا۔

امریکی صدر نے یوکرین کی حکومت کے لیے 50 کروڑ ڈالر کی براہ راست معاشی امداد کا بھی اعلان کیا جو کہ روسی افواج کے محاصرے میں لوگوں کی زندگیاں بچانے کے لیے لڑ رہی ہے۔

جوبایئڈن نے کہا کہ روسی صدر پوٹن انتظار میں ہیں کہ یوکرین کے معاملے میں ہماری دلچسپی کم ہو جائے اور روسی صدر کو یقین ہے کہ مغرب کے اتحاد میں دراڑ آجائے گی لیکن یہ ان کی غلط فہمی ہے۔

جو بائیڈن نے مزید کہا کہ روس سے تعلق رکھنے والے تمام بحری جہازوں کے امریکی بندرگاہوں میں داخلے پر پابندی ہو گی۔

امریکی وزیر خارجہ نے کہا کہ اس المناک اور تباہ کن جنگ کا انتخاب روس نے کیا ہے اور امریکہ اور اس کے اتحادی، یوکرین کی عوام اور ان کے ملک  کے دفاع میں ان کے ساتھ کھڑے ہیں۔