قومی ٹیم کے فیلڈنگ کوچ محمد مسرور سبکدوش، شین میکڈرمٹ کو نیا کوچ مقرر کرنے کا فیصلہ

لاہور: پاکستان کرکٹ ٹیم کے فیلڈنگ کوچ محمد مسرور نے اپنی ذمہ داریوں سے دستبرداری اختیار کر لی ہے، جس کی وجہ پاکستان کرکٹ بورڈ (پی سی بی) کی جانب سے معاہدے میں توسیع نہ کیا جانا بتایا گیا ہے۔

محمد مسرور نے اپنے بیان میں کہا ہے کہ "ٹیم کے ساتھ میرا باب اب ختم ہو چکا ہے، تمام کھلاڑیوں اور کوچنگ اسٹاف کا شکریہ ادا کرتا ہوں جنہوں نے مجھے سپورٹ کیا۔ میں کسی مایوسی یا افسوس کے بغیر رخصت ہو رہا ہوں اور ہمیشہ پاکستان کرکٹ کا حصہ رہوں گا۔"

نئے کوچز کی تقرری کا عمل جاری
ذرائع کے مطابق، مسرور کا پی سی بی کے ساتھ معاہدہ سیریز ٹو سیریز کی بنیاد پر تھا، اور بورڈ اب سپورٹ اسٹاف میں تبدیلی کی پالیسی کے تحت نئے چہرے لانے کا ارادہ رکھتا ہے۔

پی سی بی نے قومی ٹی 20 ٹیم کے دورہ بنگلہ دیش کے لیے آسٹریلیا سے تعلق رکھنے والے کوچ شین میکڈرمٹ کو نیا فیلڈنگ کوچ مقرر کرنے کا فیصلہ کیا ہے۔ شین میکڈرمٹ اس سے قبل آسٹریلیا، بنگلہ دیش اور سری لنکا کے ساتھ کوچنگ خدمات انجام دے چکے ہیں۔

مزید برآں، گرانٹ لوڈن کو ٹیم کا اسٹرنتھ اینڈ کنڈیشننگ کوچ مقرر کر دیا گیا ہے۔

غیرملکی کوچز کے لیے اشتہار، شارٹ لسٹنگ جاری
خیال رہے کہ پی سی بی نے کچھ عرصہ قبل کوچنگ اسٹاف کے لیے اشتہار جاری کیا تھا اور ذرائع کے مطابق، بورڈ کی توجہ غیرملکی کوچز پر مرکوز ہے۔ شارٹ لسٹ کیے گئے امیدواروں میں بھی بڑی تعداد غیرملکی ماہرین کی ہے۔