غزہ میں جنگ بندی سے متعلق حماس کا جواب24 گھنٹوں میں آ جائے گا،صدر ٹرمپ

واشنگٹن: امریکی صدر ڈونلڈ ٹرمپ نےدعویٰ کرتے ہوئے کہا ہے کہ غزہ میں مستقل طور پر جنگ بندی کے حوالے سے حماس کا جواب 24 گھنٹوں میں آجائےگا۔ 

غیر ملکی میڈیا رپورٹس کے مطابق قطر اور امریکا کی جانب سے غزہ جنگ بندی کی جو نئی تجاویز حماس کو پیش کی گئی تھیں حماس اس تجویز کردہ جنگ بندی پر دیگر مزاحمتی گروپوں سے مشاورت کررہی ہے اور ممکنہ طور پر اگلے 2 دن میں جواب دے سکتی ہے۔ 

اس کے علاوہ جمعہ کے میڈیا سے گفتگو کرتے ہوئے امریکی صدر نے کہا کہ امکان ہے غزہ جنگ بندی سے متعلق حماس کا جواب اگلے 24 گھنٹوں میں آجائےگا۔

اپنے بیان میں صدر ٹرمپ نے مزید بتایا کہ اس معاملے پر سعودی عرب سے بھی بات چیت کی گئی ہے تاکہ معاہدہ ابراہیمی کے دائرہ کار کو وسیع کیا جا سکے۔

خیال رہے کہ یہ معاہدہ ان کی سابقہ صدارت کے دوران خلیجی ممالک اور اسرائیل کے درمیان تعلقات معمول پر لانے کے حوالے سے سامنے آیا تھا۔

دوسری جانب غزہ میں اسرائیلی حملے جاری ہیں اور غزہ کی وزارت صحت کے مطابق بدھ اور جمعرات کے دوران اسرائیلی حملوں میں مزید 94 فلسطینی شہیدکردیے گئے جن میں سے 45 افراد امداد کے حصول کی کوشش کے دوران شہید کیے گئے۔