سعودی عرب میں امریکی دفاعی نظام "تھاڈ" فعال

سعودی عرب میں امریکی دفاعی نظام ’تھاڈ‘ (THAAD) کو باضابطہ طور پر آپریشنل کر دیا گیا ہے۔ عرب میڈیا کے مطابق، امریکی سینٹرل کمانڈ (CENTCOM) کے سربراہ جنرل ایرک کوریلا نے تصدیق کی کہ سعودی عرب میں ’تھاڈ‘ کی پہلی بیٹری نے عملی کام کا آغاز کر دیا ہے۔

جنرل کوریلا نے اس اہم پیش رفت پر سعودی فوجی قیادت اور دیگر متعلقہ حکام کو مبارکباد پیش کی اور اس اقدام کو خطے میں دفاعی تعاون کا اہم سنگِ میل قرار دیا۔

تھاڈ دفاعی نظام کیا ہے؟

تھاڈ (Terminal High Altitude Area Defense) ایک جدید امریکی دفاعی نظام ہے جو مختصر اور درمیانے فاصلے تک مار کرنے والے بیلسٹک میزائلوں کو فضا میں ہی تباہ کرنے کی صلاحیت رکھتا ہے۔ برطانوی نشریاتی ادارے کے مطابق، تھاڈ کی رینج 200 کلومیٹر جبکہ یہ 150 کلومیٹر کی بلندی تک مؤثر طریقے سے کام کر سکتا ہے۔

یہ نظام خاص طور پر ایسے خطوں میں نصب کیا جاتا ہے جہاں میزائل حملوں کا خطرہ ہو، اور اس کی تنصیب سعودی عرب کے لیے میزائل دفاعی صلاحیتوں میں ایک بڑا اضافہ تصور کی جا رہی ہے۔