میری گاڑی کا پیچھا کر کے جان بوجھ کر ہٹ کیا گیا، شہباز گِل

پاکستان تحریک انصاف (پی ٹی آئی) کے رہنما شہباز گل نے کار حادثے کو خود پر قاتلانہ حملہ قرار دیدیا۔ 

خیال رہے کہ لاہور سے اسلام آباد جاتے ہوئے شہباز گل کی گاڑی کو حادثہ پیش آیا تھا جس میں وہ زخمی ہوگئے تھے۔ 

تاہم اب سوشل میڈیا پر اسی حادثے سے متعلق شہباز گل نے پیغام جاری کیا ہے۔ 

مائیکرو بلاگنگ ویب سائٹ ٹوئٹر پر انہوں نے تحریر کیا کہ مجھ پر قاتلانہ حملہ کروانے والوں کو بتانا چاہتا ہوں کہ اپنے مولا اور قوم کی دعاؤں کی وجہ سے زندہ ہوں۔

انہوں نے الزام عائد کیا کہ میری گاڑی کا پیچھا کر کے جان بوجھ کر ہٹ کیا گیا، یہ ایک منصوبے کے تحت کیا گیا۔

شہباز گل نے کہا کہ میں نے کل ہی کہا تھا کہ کیا زیادہ سے زیادہ آپ ہمیں قتل کروا دیں گے؟ کروا لیں، غداری نہیں کروں گا۔

پی ٹی آئی رہنما نے کہا کہ عمران خان کے ساتھ کھڑا تھا، کھڑا ہوں اور کھڑا رہوں گا۔

انہوں نے یہ بھی تحریر کیا کہ میں آج قوم کو بتانا چاہتا ہوں یہ خان پر بھی حملہ آور ہوں گے، یہ ہر قیمت پر ہمیں چپ کروانے کی کوشش کریں گے۔

شہباز گل نے کہا کہ بیرونی سازش کے لوکل ہینڈلرز اور غداروں کو یہ پتہ ہے کہ عمران خان اور اس کے ساتھی چپ نہیں بیٹھیں گے، سب کو بے نقاب کریں گے۔