شہباز گل کو گرفتاری سے روکنے کے حکم میں 9 مئی تک توسیع

تفصیلات کے مطابق سلام آباد ہائی کورٹ میں  تحریک انصاف کے رہنما شہباز گل   کیخلاف فیصل آباد میں درج مقدمہ کے  کیس کی سماعت ہوئی ، کیس کی  سماعت چیف جسٹس اطہر من اللہ نے کی  ۔  دوران سماعت  شہباز گل نے عدالت کو بتایا کہ مریم نواز کا بیان موجود ہے کہ انہیں کچلنا چاہیے، پتہ نہیں اگلی سماعت پر میں آپ کے سامنے موجود بھی ہوں گا یا نہیں۔ 

 جس پر چیف جسٹس اطہر من اللہ نے ریمارکس دئیے  کہ  آپ ایسا نہ کہیں، سیاسی جماعتیں رائے عامہ ہموار کرتی ہیں، پولیٹیکل لیڈر کا بہت بڑا کردار ہوتا ہے ۔ اگر آئین نہیں ہوگا اداروں کا احترام نہیں ہوگا تو افراتفری ہوگی ، اگر ساری چیزیں سیاسی بیانیے پر ہوں گی تو پھر اس  کا اختتام انتشار پر ہوگا۔

شہبازگِل نے کہا کہ کبھی کسی کے خلاف مقدمہ درج نہیں کرایا، پیکا آرڈیننس کا سہارا بھی نہیں لیا، آپ کی ججمنٹ قانون کے مطابق ہوتی ہیں، وہ حق میں ہوں یا خلاف،ان کیساتھ کھڑا ہوا۔

اس موقع پر عدالت نے شہبازگِل کو گرفتاری سے روکنے کے حکم میں 9 مئی تک توسیع کرتے ہوئے انہیں آئندہ سماعت پر پیشی سے استثنیٰ بھی دے دیا۔

بعد از سماعت میڈیا سے بات کرتے ہوئے شہباز گل نے کہا کہ 7 لوگ مجھے قتل کرنا چاہتے ہیں، دھمکیاں بھی دی گئیں ہیں، اگر مجھے قتل کیا گیا تو یہ 7 لوگ ذمہ دار ہوں گے، جن کے نام میں نے اپنے وکیل کو لکھ کر دیئے ہیں۔

شہباز گل کاکہنا تھا کہ عمران خان نے جس تحریک کی بنیاد رکھی تھی وہ خودداری اور انصاف تھا، بدتمیزی کی زبان استعمال کرنے کیخلاف میں بھی سخت زبان استعمال کرتا ہوں، مخالفین کہتے تھے کہ وقت آنے پر میں سب سے پہلے بھاگ جاوں گا، لیکن میں بیگ لےکر نہیں بھاگا، بیساکھی لے کر بھی عمران خان کے ساتھ کھڑا ہوں۔

واضح رہے کہ گزشتہ روز شہباز گِل کی گاڑی کو موٹر وے پر حادثہ پیش آیا جس میں وہ زخمی ہو ئے۔