سری لنکا میں معاشی بحران سنگین ، وزیراعظم مستعفی 

غیرملکی میڈیا کے مطابق سری لنکا میں معاشی بحران سنگین ہوگیا ، وزیراعظم مہندرا راج پکسا  نے اپنا استعفی صدر گوتابایا راجا پکشے کو بھیج دیا ہے ۔

یہ اقدام کولمبو میں راجا پکسے کے حامیوں اورحکومت مخالف مظاہرین کے درمیان پرتشدد جھڑپوں کے بعد ملک میں کرفیو کے نفاذ کے بعد سامنے آیا ۔

غیرملکی میڈیا کے مطابق  کل  سے اب تک سری لنکا میں  ملکی حکمراں اور مخالف گروپوں میں جاری پر تشدد مظاہروں میں اب تک حکمران جماعت کے ایک رکنِ پارلیمنٹ  سمیت پانچ افراد ہلاک جبکہ 190 زخمی ہو چکے ہیں اور حکام کی جانب سے ملک بھر میں عائد کرفیو میں بدھ تک توسیع کر دی گئی ہے تاکہ حالات قابو میں لائے جا سکیں۔

کرفیو اور ایمرجنسی کےباوجودحکومتی پالیسیوں سے نالاں مشتعل افراد نے حکمران راجا پکشے خاندان اور متعدد اراکین اسمبلی کے گھر جلا ڈالے ہیں ۔ سکیورٹی اہلکاروں کی فائرنگ سے افراتفری پھیل گئی ۔  

واضح رہے کہ حکومت مخلاف مظاہرین صرف وزیر اعظم کے استعفی سے مطمئن نہیں اور انھوں نے مہندا راجا پکشے کے سرکاری گھر کا محاصرہ کرنے کی بھی کوشش کی ، اس وقت مہندا راجا پکشے اپنے گھر میں ہی موجود تھے۔

خیال  رہے کہ بحرالہند میں سوا دو کروڑ سے زیادہ آبادی والے اس ملک کو اپنی آزادی کے بعد بدترین معاشی بحران کا سامنا کررہا ہے۔ سری لنکا میں مہنگائی اور بجلی کی بندش کے خلاف گذشتہ مہینے سے احتجاج کا سلسلہ جاری ہے۔

سری لنکا ایک بڑے معاشی بحران سے دوچار ہے جو کہ جزوی طور پر غیر ملکی کرنسی کے ذخائر میں کمی کی وجہ سے پیدا ہوا ہے۔

سری لنکا  کو بڑے پیمانے پر بجلی کی لوڈشیڈنگ، ایندھن، ضروری اشیائے خورد و نوش اور ادویات کی کمی کا سامنا ہے جس کے سبب عوام کا حکومت کے خلاف غصہ بہت زیادہ بڑھ گیا ہے۔