عمران خان کے لیے سب سے پہلے میں گولی کھاؤں گا:علی محمد خان

فیصل آباد جلسے سے خطاب میں رہنما تحریک انصاف علی محمد خان نے کہا کہ جب جب عمران خان نے کال دی فیصل آباد باہر نکلتا ہے، عمران خان سے پوری دنیا کے مسلمانوں کی امیدیں جڑی ہوئی ہیں،پاکستان کے فیصلے امریکہ اور دیگر ممالک میں نہیں ہو سکتے، پاکستان کے فیصلے پاکستان کے عوام کریں گے۔

انہوں نے کہا کہ عمران خان کے لیے سب سے پہلے میں گولی کھاؤں گا، عمران خان تک پہنچنے والی گولی کو 22 کروڑ سینے چاک کر کے گزرنا ہوگا، پاکستان کی فوج پاکستان کی پولیس اور پاکستان پر مر مٹنے والا ہر شخص عمران خان کے دست و بازو ہیں۔

محمد علی خان نے کہا کہ قائد اعظم نے 1942ء میں فرمایا تھا کہ مجھ سے اکثر پوچھا جاتا ہے کہ جس پاکستان کی بات آپ کرتے ہیں اس پاکستان کا طرز حکمرانی کیا ہوگا، تو انہوں نے کہا کہ "میں کون ہوتا ہوں پاکستان کے طرز حکمرانی کا فیصلہ کرنے والا، یہ فیصلہ تو 14 سو سال پہلے قرآن مجید میں ہو چکا،قرآن رہتی دنیا تک ہماری رہنمائی کے لیے موجود رہے گا"۔ عمران خان نے ریاست مدینہ کی بات کر کے کیا جرم کر دیا؟