میرے دل میں تکلیف ہوتی ہے جب عمران خان کا نام لینا پڑتا ہے:مریم نواز

رہنما پاکستان مسلم لیگ ن مریم نواز شریف نے گجرات میں جلسے سے خطاب کرتے ہوئے کہا کہ میرا بس چلے تو عمران خان کا کبھی نام نہ لوں، مگر ميرا فرض ہے کہ ملک اور عوام کو اس فتنے سے بچاؤں، عوام کو فتنے سے بچانے کےلیے مجھے اس جھوٹے شخص کا نام لينا پڑتا ہے۔

مریم نواز نے سابق وزیر اعظم عمران خان کو مخاطب کرتے ہوئے کہا کہ ہم اپنے بدترين دشمن کے لیے بھی موت کی دعا نہيں کرتے، اللہ کرے تم زندہ رہو اور نواز شريف کی کاميابياں ديکھو، عمران خان کسی حادثے کا انتظار نہ کرو، ویڈيو سامنے لاؤ، ضمانت ديتی ہوں نواز شريف تمہيں شہباز شريف سے زيادہ سيکيورٹی فراہم کرے گا۔

انہوں نے کہا کہ  عمران خان مہنگائی کی بات کرتا ہے تو اپنے خلاف چارج شيٹ پيش کرتا ہے، عمران خان معيشت کے لیے بارودی سرنگيں بچھاکر گيا ہے، پاکستان کی معيشت کو جاتے جاتے وينٹی ليٹر پر ڈال گيا ہے، مہنگائی کرنے والا آج کہہ رہا ہے کہ مہنگائی ہوگئی۔

مریم نواز کا کہنا تھا کہ ان کی چیخیں بتا رہی ہیں کہ اسٹیبلشمنٹ نےان کا نمبر بلاک کردیا ہے، وہ جس نمبر پر فون کرتے ہیں اب وہ نمبر بدل گیا ہے، جب وہ عوام سے ووٹ مانگیں گے تو رانگ نمبر کی آواز آئے گی۔

مریم نواز کے بعد وزیر اعلیٰ پنجاب حمزہ شہباز نے بھی جلسے سے خطاب کیا جس میں انہوں نے کہا کہ وزیراعلیٰ کہ عمران خان کا بندوبست نہ کیا گیا تو یہ پاکستان کو کھاجائے گا۔

حمزہ شہباز نے کہا کہ تم نے ايک کروڑ نوکرياں دينے کی بجائے لاکھوں کو بے روزگار کرديا،کبھی سازش کا رونا روتے ہو کبھی کہتے ہو جان کو خطرہ ہے،عمران خان تم نے پاکستانی معيشت کو ڈبوديا، آج بھی جھوٹی سازش کا رونا رو کر پاکستان کو بدنام کر رہے ہو۔

انہوں نے کہا کہ عمران خان توشہ خانہ کا حساب دينے سے چھپ رہا ہے، تمہیں تکلیف ہے کہ سپریم کورٹ کے دروازے رات12بجے کیوں کھلے، تم بازنہ آئے تو تمہارے ليے جيلوں کے دروازے بھی کھول سکتے ہیں۔