وزیرِاعظم کی ہدایت پر موسمیاتی تبدیلی پر ٹاسک فورس کا قیام

تفصیلات کے مطابق وزیراعظم  شہباز شریف نے مستقبل میں شیشپر گلیشئر جیسے واقعات سے بچاؤ کے اقدامات کرنے کی ہدایت کرتے ہوئے کہا ہے کہ پانی کے بچاؤ کیلئے عوامی آگاہی مہم کا آغاز کیا جائے۔

وزیراعظم نے کہا کہ ٹاسک فورس موجودہ ذخائر کی حفاظت،جنگلات کے تحفظ کیلئے جامع حکمتِ عملی مرتب کرے گی ، اس کے علاوہ بارش کا پانی ذخیرہ کرنے کیلئے مون سون سے پہلے فوری اقدامات یقینی بنائے جائیں۔

اجلاس میں وزیرِاعظم شہبازشریف کو چولستان میں پانی کی قلت پر بھی بریفنگ دی گئی ۔  وزیرِاعظم نے ہدایت کی کہ چولستان میں انسانی بستیوں اور جانوروں کیلئے پانی کی فوری فراہمی یقینی بنائی جائے۔

انہوں نےضلعی انتظامیہ اور متعلقہ اداروں کو چولستان میں گرمی میں فوری امدادی سرگرمیاں یقینی بنانے کی ہدایت کی ہے ۔ 

وزیرِاعظم شہبازشریف نے چیئرمین این ڈی ایم اے کو فوری طور پر ہنزہ کا دورہ کرنے کی ہدایت کرتے ہوئے کہا کہ شیشپر گلیشیئر واقعےمیں گرنے والے پُل کو فوری تعمیر کیا جائے۔

وزیرِاعظم نے پُل تعمیر پر پیشرفت سے متعلق آئندہ اجلاس میں تفصیلی رپورٹ پیش کرنے کی ہدایت کی ۔ 

پاکستان موسمیاتی تبدیلی کے خطرے سے دوچار ہونے والے ممالک میں پانچویں نمبر پر ہے۔ پانی کی کمی کے خطرے کا براہِ راست اثر پاکستان کی زراعت پر ہے اور اس ضمن میں حکومت ہر ممکن اقدامات کرے گی۔ پانی کے بچاؤ اور اس کے ضیاع کو روکنے کے لیے ہم سب کو اپنا انفرادی کردار بھی ادا کرنا ہوگا۔

— Shehbaz Sharif (@CMShehbaz) May 16, 2022