وزیر اعظم کی آصف زرداری اور مولانا فضل الرحمان کے ساتھ ملاقات

تفصیلات کے مطابق وزیر اعظم شہباز شریف نے سابق صدر آصف علی زرداری اور رہنما جے یو آئی ف مولانا فضل الرحمان سے وزیر اعظم ہاؤس میں علیحدہ علیحدہ ملاقاتیں کی ہیں۔

پاکستان مسلم لیگ ن کے آفیشل ٹوئیٹر اکاؤنٹ سے شیئر کی گئی تفصیلات کے مطابق وزیر اعظم شہباز شریف نے مولانا فضل الرحمان سے ملاقات میں ملک کی موجودہ سیاسی و معاشی صورت حال پر بات چیت کی۔

وزیر اعظم شہباز نے کہا کہ ملک میں جمہوریت کے استحکام اور عوام کی فلاح و بہبود کو یقینی بنانے کے لیے تمام اتحادی جماعتوں کا مل کر کام کرنا بہت ضروری ہے، حکومتی سطح پر فیصلے کرتے ہوئے قومی مفاد مقدم رکھا جائے گا۔

ملاقات میں دونوں رہنماؤں کی جانب سے اس بات پر اتفاق کیا گیا کہ جمہوریت اور آئین کی پاسداری ہی پاکستان کی ترقی اور استحکام کی ضامن ہے.

مولانا فضل الرحمان سے ملاقات کے بعد وزیر اعظم شہباز شریف سے آصف زرداری نے بھی وزیر اعظم ہاؤس میں ملاقات کی جس میں موجودہ سیاسی صورت حال پر تبادلہ خیال کیا گیا۔

خیال رہے کہ وزیراعظم شہباز شریف لندن واپسی کے بعد اتحادی جماعتوں کا اجلاس کل طلب کر رکھا ہے، اجلاس میں فوری انتخابات یا سخت معاشی فیصلوں پر مشاورت متوقع ہے۔