کراچی:کھارادر کپڑا مارکیٹ میں دھماکہ، خاتون جاں بحق

میڈیا ذرائع کے مطابق دھماکہ کھارادر پولیس اسٹیشن کی حدود میں میمن مسجد کے قریب کپڑا مارکیٹ میں ہوا جس میں ایک خاتون جان کی بازی ہار گئیں، 11 افراد زخمی ہوئے، زخمیوں کو اسپتال منتقل کر دیا گیا ہے۔

وزیراعلیٰ سندھ مراد علی شاہ نے کھارادر میں دھماکے کا نوٹس لیتے ہوئے ڈسٹرکٹ ایڈمنسٹریشن پولیس کو فوری واقعہ کی جگہ پہنچ کر عوام کی مدد کرنے کی ہدایت کی ہے اور آئی جی سندھ سے تفیصلی رپورٹ بھی طلب کی ہے۔

وزیراعظم شہباز شریف نے کراچی دھماکےکی مذمت کرتے ہوئے جاں بحق ہونے والی خاتون اور زخمیوں کے اہل خانہ سے اظہار ہمدردی کیا ہے۔

سابق گورنر سندھ عمران اسماعیل نے دھماکے کی مذمت کی ہے، کہا کہ امن دشمن قوتیں ایک بار پھر کراچی میں سرگرم ہوگئی ہیں،حالیہ واقعات ایک سوچی سمجھی سازش کا حصہ ہیں۔

یاد رہے کہ پچھلے کچھ عرصے سے کراچی ایک مرتبہ دہشتگردی کے نشانے پر ہے، 26 اپریل کو کراچی یونیورسٹی کے اندر بھی ایک دھماکہ ہوا تھا جس میں 3 چینی شہریوں سمیت 4 افراد جان کی بازی ہار گئے تھے۔

اس پہلے مئی کے مہینے میں بھی کراچی کے علاقے صدر میں داؤد پوتہ روڈ پر ہونے والے بم دھماکے کے نتیجے میں 1 شخص جاں بحق اور متعدد زخمی ہوئے تھے۔